ने. सं. ११४४ कछलागा द्वादशी -

लाइसेन्स खारेज मयाःगु छाय् ?

माथिल्लो कर्णाली भारतया कब्जाय्

येँ – आः अनुमति कयाः नं ज्या शुरु मयाइपिं जलविद्युत कम्पनीतय्त बियातःगु लाइसेन्स खारेज यायेगु धकाः नियम दयेकूसां नं भारतीय कम्पनीया ल्हातय् लानाच्वंगु माथिल्लो कर्णालीया लाइसेन्स धाःसा आः तक खारेज मयाःगु खँय् सम्बन्धित विज्ञत अजूचाःगु दु ।

नेपाःया आः तकया हे दकलय् तःधंगु जलविद्युत परियोजना धयातःगु ९०० मेगावाट क्षमताया थ्व परियोजना न्ह्याकेगु लाइसेन्स भारतया जीएमआर कम्पनीं कयातःगु खः । न्यादँ न्ह्यः थ्व लाइसेन्स काःबलय् निदँया दुने निर्माण शुरु यायेगु धकाः सहमति जूगु खः । तर निदँ थ्यंबलय् जीएमआरं लगानी चूलाकेगु कुतः यानाच्वन धकाः दछि म्याद थप याकल ।

वंगु वालय् थपे याःगु दछि नं क्वचाल । तर लगानी तकं चूलाके फुगु मखुनि । निदँया म्यादयात स्वदँ दयेकाः उकी नं मेगु दछि थप याना बी धुंकलं नं ज्या शुरु मयाःनि । थ्व परियोजनाया ज्या लगानी बोर्डं स्वयाच्वंगु खः । तर वंगु वालय् च्वंगु लगानी बोर्डया बैठकय् थुकिया बारे चर्चा तकं मजूगु खँ सम्बद्ध सूत्रं धाःगु दु ।

थज्याःगु कम्पनीयात बियातःगु लाइसेन्स छाय् आः तक खारेज मयात धइगु खँय् विज्ञतय्सं आश्चर्य प्वंकाहःगु दु । माथिल्लो कर्णाली मेगु देशं मकायेमा धकाः होल्ड जक याना तयेगु लागिं भारतं डिजायन हे दयेकाः जीएमआरयात न्ह्यःने तये हःगु अनुमान जुयाच्वंगु दु ।

९०० मेगावाट क्षमताया थ्व परियोजना निर्माण यायेत १ खर्ब तका तुइगु अनुमान दु । थुकी नेपाःयात १२ प्रतिशत मत व २७ प्रतिशत शेयर उपलब्ध याकेगु सहमति जुयाच्वंगु दु ।

‘भारतयात बीम्वाः, नेपालं हे फु’
माथिल्लो कर्णाली लागाया स्थानीय जनतां धाःसा थ्व परियोजना भारतयात बी माःगु आवश्यकता हे मदुगु तर्क न्ह्यःने तये हःगु दु । माथिल्लो कर्णाल बचाउ अभियानं थ्व परियोजना नेपालं हे दयेकेमाः धासें भारतीइ कम्पीयात बियातःगु लाइसेन्स खारेज यायेत माग याःगु दु । भारतं थ्व परियोजना थःपिंसं नं मदयेकेगु व मेपिंत नं दयेके मबीगु नीति कयातःगु अभियानया द्वपं दु ।