देय् दबूया १२ व २१ वडाय् वडा कमिटी
येँ – नेवाः देय् दबूया येँ महानगर अन्तर्गत १२ व २१ वडा कमिटी गठन याःगु दु । वंगु शनिवाः निगू वडाया मंकाः मुँज्यां बिस्कं बिस्कं वडा कमिटी गठन याःगु खः ।
नेवाः देय् दबू बागमति प्रदेशया नायः उमेश स्थापित मूपाहांकथं झायादीगु ज्याझ्वलय् विशेष पाहांकथं येँ जिल्ला नायः मचाराजा महर्जन झायादीगु खः । निगू वडाया मंकाः भेलां १२ वडाय् बालमुकुन्द महर्जनया संयोजकत्वाय् १५ म्ह दुजः दुगु वडा कमिटी व २१ वडाय् राजेश श्रेष्ठया संयोजकत्वय् १३म्ह दुजः दुगु वडा कमिटी गठन याःगु खः ।
नवगठित वडा कमिटीया पदाधिकारी व दुजःपिंत येँ महानगर समितिया नायः शोभा महर्जन वज्राचार्यं सपथ ग्रहण याकादीगु खःसा निगुलिं वडा कमिटीया नायःपिंसं थःथःगु प्रतिबद्धता नं प्वंकादीगु खः।
येँ महानगर समितिया सचिवालय दुजः अमिता महर्जनया सभापतित्वय् न्ह्याःगु भेलाय् बागमति प्रदेशया नायः स्थापितजुं नेवाः देय् दबूया गठन व थुकिया अौचित्यबारे नुगःखँ तयादीगु खःसा येँ जिल्ला नायः मचाराजा महर्जन व येँ महानगर समितिया नायः मय्जु शोभा महर्जन बज्राचार्यजुपिंंसं नं देय् दबूया थीथी पक्षयात कयाः नुगःखँ तयादीगु खः ।
भेलाय् नेवाः देय् दबू, बागमति प्रदेशया दुजः मय्जु प्रा.डा. अमिता प्रधान शाक्य, येँ जिल्लाया दांभरि भाजु धर्म शाक्य, दुजःपिं, हिराकाजी महर्जन व कमलतारा तुलाधर, येँ महानगर समितिया न्वकु लिसें पूर्वी लागाया कजि रमेशकुमार जोशी, छ्याञ्जे अर्विन्द्रमान सिं, लिउ छ्याञ्जे सुनील महर्जन, मिरा महर्जन, बालकृष्ण श्रेष्ठ, ३१ वडा कमिटीया नायः जगदिश श्रेष्ठ लगायत महानगर समितिया आपालं दुजःपिनिगु नं उपस्थित दुगु खः ।
येँ महानगर समितिया ल्यू छ्याञ्जे सुनील महर्जनजुं लसकुस यानादीगु ज्याझ्वः छ्याञ्जे अर्विन्द्रमान सिंहं न्ह्याकादीगु खः ।
LEAVE YOUR COMMENTS