भ्यू टावर सिबें नं विकासया माग

येँ – येँया पुलांगु बसपार्कय् दयेकेगु शुरु जुयाच्वंगु काठमाडौं भ्यू टावर विवादय् लानाच्वंगु हे इलय् उखे प्रधानमन्त्री केपी ओलीया गृहजिल्ला झापाया दमकय् दयेकेगु धकाः प्रस्तावित जूगु भ्यू टावरयात स्थानीय जनतां विरोध याना हःगु दु । दमकया ढुकुरपानीइ २ अर्ब २५ करोड तकाया लागतय् दयेकेत्यंगु उगु भ्यू टावर सिबें नं न्हापां जिल्लाया सतक स्तरोन्नति यायेगु व स्कूल बांलाके माःगु माग स्थानीय मनूतय्सं याना हःगु दु । दमकय् बांलाःगु अस्पताल छगू तकं मदुगु इलय् न्हापां अस्पताल दयेकाः लिपा भ्यू टावर दयेकूसां जिउगु खँ स्थानीय मनूतय्सं धया हःगु दु ।

तर जिल्लाया नेकपा कार्यकर्तातय्सं धाःसा भ्यू टावरया लागिं सरकारं बजेट हे फ्यायेधुंकूगु जुयाः थ्व ज्यायात रोके यात धाःसा मेगु ज्याया लागिं नं बजेट मवयेफुगु जुयाः थुकियात विरोध मयायेत इनाप यानाच्वंगु दु । भ्यू टावर वल धाःसा उगु लागाया विकास जुइगु दावी नं उमिसं यानाच्वंगु दु ।

थुखे राजधानी येँय् दयेकाच्वंगु भ्यू टावर धाःसा ठेकेदारं बांलाक ज्या मयाःगु कारणं येँ महानगरपालिकाया लागिं कपाः स्याःगु विषय जूगु दु । न्हापा कर्मचारीं मनपा चले यानाच्वंगु इलय् सम्झौता जूगु थ्व भ्यू टावर दयेकेत दछिया दुने सम्पूर्ण पूर्वाधार तयार यायेगु धाःसां आः तक छुं ज्या मजूगुलिं आः छु यायेगु धकाः मनपाय् सहलह जुयाच्वंगु दु । थ्व ज्या ठेकेदारं मेम्ह ठेकेदारयात बीधुंकूगु चर्चा नं दु ।
थज्याःगु हे छगू भ्यू टावर विराटनगरय् नं दयेकेगु धकाः छुं ई न्ह्यः शिलान्यास याःगु खः । तर शिलान्यास धुंकाः उकिया ज्या धाःसा न्ह्याः मवंगु खँ स्थानीय मनूतय्सं धाःगु दु ।