तःमुँज्या व सांस्कृतिक ज्याझ्वःया सिरपाः लःल्हात

ख्वप(नेपालभाषा टाइम्स)- नेपालभाषा साहित्य तःमुँज्याया ग्वसालय् थुगुसी जूगु पीनिक्वःगु नेपालभाषा साहित्य तःमुँज्यालिसें सांस्कृतिक ज्याझ्वलय् उत्कृष्ट जूपिंत सिरपाः लःल्हाःगु दु । ज्याझ्वलय् साहित्य विधाय् उत्कृष्ट साहित्यकारलिसें मूल्यांकन समितिया दुजःपिं व न्हूदँया ¥यालीइ ब्वति काःगु थीथी पुचःयात नं सिरपाः व मतिनाया चिं लःल्हाःगु खः ।

ज्याझ्वलय् नवासें नेपाल मजदुर किसान पार्टीया नायः नापं वरिष्ठ राजनीतिज्ञ नारायणमान बिजुक्छेँ रोहितं नेतातय् कारणं देय् झन्झन् पराधीन जुया वनाच्वंगु धासें आः जनतां देय् बचे यायेमाःगु ई वःगु दु धयादिल । वय्कलं सत्तारुढ दलया नेतातय् अकर्मण्यता व अदूर्दर्शिताया कारणं देय् झन जक पराधीन जुजुं वनाच्वंगु धासें आः देय्यात बचे यायेत जनता हे न्ह्यचिलेमाः धयादिल । लिसें वय्कलं जनतां देय् बचे मयायेगु खःसा नेपाः धइगु नां जक दइगु व भूमि धाःसा भारतया जुइगु दावी नं यानादिल ।

नेमकिपाया सचिवलिसें प्रतिनिधिसभा सदस्य पे्रम सुवालं नकतिनि क्वचाःगु निर्वाचनय् यक्व मत हःगु व अप्वः सिट संख्या त्याकूगु दलाखें आः देय् व जनताया भिं जुइगु ज्या जुइमखु, इमिसं अज्याःगु ज्या नं याइमखु धयादिल ।

पार्टीया केन्द्रीय दुजःलिसें ख्वप नगरपालिकाया प्रमुख सुनिल प्रजापतिं नेपाःया भाषा, कला, संस्कृति, सम्पदा ल्यंकेत ख्वप नगरपालिकां स्थानीय पाठ्यक्रमय् व्यवस्था यानागु जानकारी बियादिसें सम्पदा संरक्षण, शिक्षा, स्वास्थ्य व सरसफाइया क्षेत्रय् नं नगरपालिकां यानाच्वंगु ज्याया कारणं थीथी गाउँपालिका व नगरपालिकाया जनप्रतिनिधि ख्वपया अवलोकन यायेत वयाच्वंगु धयादिल ।

बागति प्रदेशसभा सदस्य सुरेन्द्रराज गोसाइं नेपालभाषा साहित्य तःमुँज्या भाषिक व साहित्यया विकासलिसें वर्गीय आन्दोलनया छगू दबू जूगु विचाः तयादिल ।

सम्बन्धित बुखँ

LEAVE YOUR COMMENTS