चुनाव लक्षित नेवाः मंकाः मुद्दा सार्वजनिक
यल (नेपालभाषा टाइम्स)- नेवाः देय् दबू बागमति प्रदेश व स्वनिगः विशेष प्रदेश समितिं न्ह्यःने वयाच्वंगु प्रतिनिधि व प्रदेशसभाया निर्वाचनया निंतिं नेवाः मंकाः मुद्दा सार्वजनिक याःगु दु । वंगु मंगलवाः थनया नेपालभाषा मंकाः खलःया दबू छेँय् छगू पत्रकार सम्मेलन यासें नेवाः मंकाः मुद्दा (अवधारणापत्र) सार्वजनिक याःगु खः ।
देय् दबूपाखें देय्न्यंकंया नेवाःतय् मग न्ह्यब्वयेकथं मंसिर ४ गते जुइगु निर्वाचनय् ब्वति कयाच्वंपिं उम्मेदवारतय्त लःल्हायेकथं उगु अवधारणापत्र तयार याःगु खः । निगुलिं प्रदेश समितिं मंकाःकथं तयार याःगु नेवाः मुद्दाय् प्रदेशया झिंस्वंगू जिल्लायात प्रतिनिधित्व याइकथं झिंस्वंगू हे बुँदाय् अवधारणा तयार याःगु खः ।
स्वनिगः विशेष प्रदेशया नायः श्रीकृष्ण महर्जनं सार्वजनिक यानादीगु अवधारणापत्रय् भाषा आयोगं सिफारिस याःकथं बागमति प्रदेशय् नेवाः भाय् सरकारी ज्याखँया भाय् जुइमाःगु, संविधानया धाराा ५६ या ५ य् जुयाच्वंगु व्यवस्थाकथं नेवाः बाहुल्यता दुगु लागाय् स्वायत्त, संरक्षित व विशेष क्षेत्र घोषणा यायेमाःगु, प्रदेश प्रज्ञा प्रतिष्ठान गठन यायेमाःगु, नेपाल संवत्यात प्रदेशय् कार्यान्वयन यायेमाःगु, १२ गू तगिं तक ऐच्छिक विषयया रुपय् नेपालभाषा व तामाङ भाय् दुथ्याकेमाःगु माग यानातःगु दु ।
अथे हे भू उपयोग नीति लागू यायेमाःगु, प्रदेशय् विकसित लिपियात प्रदेशय् लागू यायेमाःगु, प्रदेशया संचारय् प्रदेशया भाय्यात विशेष थाय् बियाः समावेशीता नीति लागू यायेमाःगु, प्रदेशय् विकसित लिपि लागू यायेत आवश्यक कानून निर्माण यायेमाःगु, प्रथाजन्य संस्था गुथियात मान्यता बीमाःगु, आदिवासी नेवाःतय् ज्ञान पुस्तान्तरण व हस्तान्तरणया योजना हयेमाःगु, नेवाःतय् लजगाः, प्रविधि व कला लगायतया विषययात विशेष स्थान बीमाःगु, समुदायया सरोकार दुगु व प्रभावित याइगु ज्याखँय् निर्णय यायेत समुदाययात अग्रिम जानकारी बियाः मञ्जुरी कायेमाःगु लगायतया खँ दुथ्याकातःगु दु ।
सार्वजनिक नेवाः मुद्दायात प्रदेशया राजनीतिक दल, उम्मेदवारयात लःल्हायेगु व उकियात कार्यान्वयनया निंतिं प्रतिवद्धता प्वंके बीगु समितिं जानकारी बिउगु दु ।
LEAVE YOUR COMMENTS