गौतमश्री सहकारी बिसिउँ वन

येँ (नेपालभाषा टाइम्स)-येँया वडा १४ स्थित कुलेश्वरय् च्वंगु गौतमश्री बहुउदेश्यीय सहकारीया सञ्चालक बिसिउँ वंगु दु । सहकारीया सञ्चालकत बचतकर्ताया ध्यबा ज्वनाः अफिस तकं यानाः बिसिउँ वंगुलिं निक्षेपकर्तात सहकारी विभागया शरणय् वंगु दु ।

बचतकर्ताया ध्यबा ज्वनाः सहकारीया अध्यक्ष रामबहादुर गौतम व महाप्रबन्धक रविन्द्र बिष्ट बिसिउँ वंगु खँ पीडित बचतकर्तातय्सं धाःगु दु । सहकारी सञ्चालकत फरार जुइवं एभरेष्ट बैंकं सहकारी सिल यानाबिउगु दु । सञ्चालक गौतमया मेमेगु व्यवसायय् नं थःपिनिगु लगानी दुगु धासें बैंकं सिल याना बिउगु खः । तर सहकारीलिसे धाःसा बैंकया गुगुं नं कथंया लेनदेन मदुगु खँ धाःगु दु ।

उगु सहकारीइ २५ हजार स्वयां अप्वः बचतकर्तातय्सं ध्यबा मुंकातःगु खँ धाःगु दु । कुलेश्वरय् सहकारीया थःगु तखागु भवन दु ।