क्यानाडाया नेवाःतय्सं सत्यमोहन लुमंकल

येँ(नेपालभाषा टाइम्स)÷क्यानाडाय् च्वंपिं नेवाःतय्सं वाङ्मय शताब्दीपुरुष सत्यमोहन जोशीयात लुमंकल । क्यानेडियन नेवाः गुथिपाखें सत्यमोहन जोशीया झिंस्वन्हुया पुण्य तिथि लाकाः भर्चुअल माध्यमं श्रद्धाञ्जली ज्याझ्वः याःगु खः ।

वाङ्मय शताब्दी पुरुष जोशीया लुमन्तिइ छगू मिनेट मौन धारण यासें न्ह्याःगु ज्याझ्वलय् नवासें गुथिया नायः प्रकाशलाल प्रधानं शताब्दी पुरुष जोशी मदयाः देशं छम्ह शालिनम्ह संस्कृतिविद् व सम्पदाविद् त्वःफिकेमाःगु दु धयादिल ।

गुथिया मूछ्याञ्जे विमल श्रेष्ठं थनिं थनिं प्यदँ न्ह्यः थः नेपाः वनागु इलय् जोशीयात नाप लायेगु ह्वःताः चूलाःगु व उगु इलय् गुथिपाखें नेवाः संस्कृति संरक्षणया निंतिं यानाच्वंगु ज्यायात च्वछायादिसें भाषा, संस्कृति संवद्र्धनया निंतिं सकलें छप्पँ जुयाः लगे ज्या यायेत इनाप यानादीगु खँ कनादिल ।

दांभरिं राजेन्द्र महर्जनं मदुम्ह वाङ्मय शताब्दी पुरुष जोशीयात थम्हं नाप लायेगु इच्छा गुबलें नं पूवनीमखुत धासें वय्कः नेवाः समुदायया व्यक्तित्व जूसां नेवाः समुदायं पिने च्वंपिंसं नं वय्कलं देय् व समाजया निंतिं बियादीगु योगदानयात कयाः आपाःसिनं च्वयेगु व सम्मान यायेगु यानाच्वंगु खँ कनादिल ।

ज्यासना पुचःया दुजः डा. कृष्ण कायस्थं सत्यमोहन जोशीया जीवन व योगदानयात कयाः च्वयादीगु चिनाखँ ब्वनाः न्यंकादीगु खः । लिसें वय्कलं थम्हं च्वयागु सफू ‘नेवाः संस्कृति व संस्कार’ सपूm जोशीया हे ल्हाचं विमोचन याके खंगुलिं लय्ताःगु खँ कनादिल ।
मेम्ह दुजः डा. प्रज्वल प्रधानं नेपाःया आपालं पुरातात्विक सम्पदाया संरक्षण व संवद्र्धनया निंतिं बियादीगु व संघसंस्था नीस्वनेगु ज्याय् वय्कलं बियादीगु योगदानयात कयाः चर्चा यानादिल ।

ज्याझ्वलय् सामाजिक अभियन्ता ज्योति वैद्य, नेपाल सरकार वनस्पति विभागया पुलांम्ह महानिर्देशक डा. तारकेश्वरी राजभण्डारी, गुथिया पुलांम्ह मूछ्याञ्जे प्रदीपलाल श्रेष्ठ, न्वकु उत्तम माकःजु लगायतं जोशीया योगदान व वय्कः थीथी पक्षयात कयाः विचाः प्वंकादीगु खः ।