प्रमयात थरुहटय् दुमकायेगु ख्याच्वः

येँ (नेपालभाषा टाइम्स) – रेशम चौधरी लिसे झिंछम्ह थारु अभियन्तातय्त स्वलाया दुने मत्वःतल धाःसा प्रधानमन्त्री केपी ओली लगायत मन्त्रीत व प्रमलिसे सतीपिं सांसदतय्त थरुहट क्षेत्रय् दुमकायेगु ख्याच्वः थरुहट थारुवान राष्ट्रिय मोर्चां बिउगु दु ।

म्हिगः मोर्चालिसे नेपाल आदिवासी जनजाति महासंघ ७ नम्बर प्रदेश समन्वय परिषद्, नेपाल लोकतान्त्रिक पार्टी कैलाली, खसान राष्ट्रिय संघर्ष समितिलिसे थीथी च्यागू पार्टीं धनगढीइ याःगु पत्रकार सम्मेलनय् उगु ख्याच्वः बिउगु खः । पत्रकार सम्मेलनय् थरुहट थारुवान राष्ट्रिय मोर्चाया केन्द्रीय संयोजक लक्ष्मण थारुं टिकापुर घटनायात आपराधिक घटना दयेकाः रेशम चौधरी लगायत ११ म्हेसित सरकारं कुनातःगु व उमित स्वलाया दुने मत्वःतल धाःसा उकिं ब्वलनीगु परिस्थितिया जिम्मेवार प्रधानमन्त्री जुइगु खँ कनादिल ।

वय्कलं धयादिल, ‘जिमिसं पटक पटक सरकारया ध्यानाकर्षण यायेधुनागु दु, तर सुनुवाई मजू । आः वइगु स्वलाया दुने नं सुनुवाइ मजुल धाःसा निर्णायक आन्दोलन यायेगु जुइ ।’

मंकाः आन्दोलन संघर्ष समितिं वइगु साउन २५ गतेनिसें असोज ३ गते तकया ज्याझ्वः नं पित बिउगु दु। ज्याझ्वः कथं २५ गते प्रदेश सरकारयात ज्ञापन पौ बीगु, भदौ २ गते मानव अधिकार तथा नागरिक न्ह्यलुवापिंलिसे धनगढीइ अन्तक्र्रिया यायेगु, ७ गते टिकापुर विद्रोहयात लुमंकूसें देय्न्यंक विरोधसभा यायेगु ग्वसाः दु ।

थुगु ईया दुने नं माग पूमवन धाःसा मोहनि, स्वन्ति व छठ पर्व लिपा सशक्त रुपं निर्णायक आन्दोलन यायेगु तयारी संघर्ष समितिं यानागु खँ धाःगु दु ।