ख्वपया स्कुलय् लिपि, भाषा व संस्कृति अनिवार्य

ख्वप – ख्वपया दक्वं स्कुलय् आवंलि नेपाल लिपि, नेपालभाषा व संस्कृतिया विषय अनिवार्य याइगु जूगु दु । ख्वप नगरपाप्रमुख सुनील प्रजापतिं आः ख्वपया दक्वं स्कुलय् नेपाल लिपि, नेपालभाषा व संस्कृतिया विषय अध्यापन अनिवार्य रुपं लागू यायेगु खँ धयादीगु खः ।

नेपालभाषा, लिपि व नेवाः संस्कृति नेवाः जातिया पहिचान खः धासें उकिया संरक्षण याये मफुत धाःसा नेवाःतय् अस्तित्व हे न्हना वनेफुगु खतरा दुगु नं वय्कलं धयादिल । ख्वप मिडिया सर्कलया प्रस्तुति कथं भादगाउँ टेलिभिजन व नमस्ते ख्वप टेलिभिजनय् न्ह्यानाच्वंगु ज्याझ्वः ‘झी अजि बाज्या’ नीन्यागू ब्व थ्यंगु लसताय् जूगु हनाज्याझ्वलय् नवासें प्रमुख प्रजापतिं उगु खँ धयादीगु खः ।

ज्याझ्वलय् नवासें वय्कलं सरकारं गुथि विधेयकय् मोहियानी हक, रैतानीया अधिकार थेंज्याःगु विषय दुथ्याकाः हाकनं विधेयक सदनय् हयेमाःगु धारणा तयादिल । ज्याझ्वलय् वय्कलं १०६ दँ दुम्ह भिमथकु प्रजापति व १०० दँ दुम्ह गोपसिं बोयजु दोसल्लां न्ययेकाः हनादीगु खःसा कलाकार, प्राविधिक व ग्वाहालिमिपिं सुभाय् पौ नं लःल्हानादिल ।

सर्कलया अध्यक्ष राजु मानन्धरया सभापतित्वय् जूगु ज्याझ्वलय् नांजाःपिं कलाकार आशाकाजी थकु, श्यामसुन्दर शिल्पकार, नमस्ते ख्वप टेलिभिजनया ऋषिकेश श्रेष्ठ, नेपालभाषा साहित्य तःमुँज्या मूगुथिया नायः चन्द्रबहादुर उलक लगायतं थःथःगु नुगःखँ प्वंकादीगु खः ।

सम्बन्धित बुखँ

LEAVE YOUR COMMENTS