शाक्यवंश व शाक्य महाविहारया इतिहास सफू

येँ(नेपालभाषा टाइम्स)- शाक्य महाविहार संघया ग्वसालय् शनिवाः जूगु ज्याझ्वलय् ‘शाक्यवंश व झिगू शाक्य महाविहारया संक्षिप्त इतिहास’ सफूया पितब्वज्या याःगु दु । उगु हे ज्याझ्वलय् झिगू महाविहारया दकलय् थकालिम्ह विकमाः बहाःया श्रद्धेय मोतिरत्न शाक्यात महास्थविर पदं विभूषित याःगु खः ।

संघया नायः शुभकाजी शाक्यया सभापतित्वय् जूगु ज्याझ्वःया उलेज्या पाहांपिंपाखें बोधि मत च्याकाः यानादीगु खः । संघ नायःलिसें नेपाल संवत् न्हूदँ समारोह समितिया नायः, बौद्ध विद्वान प्रा. डा. नरेशमान वज्राचार्य, पुलांम्ह मन्त्री डा. केशवमान शाक्य, पुलम्ह बागमति प्रदेश सांसद शोभा शाक्य व रोशन शाक्यं मंकाःकथं सफूया पितब्वज्या यानादीगु खः ।

पुलांम्ह मन्त्री डा. शाक्यं शाक्यतय् इतिहासया थीथी पक्षयात कयाः नुगःखँ तयादीगु खःसा न्हूदँ समारोह समितिया नायःलिसें बौद्ध विद्वान प्रा. डा. वज्राचार्यं नेवाः समाजय् शाक्यतय् विशेषता, इतिहासलिसें नेवाःतय्सं हनीगु नखःचखःया मौलिकता व उकिया पद्दतियात कयाः नुगःखँ तयादीगु । ज्याझ्वलय् पुलांम्ह प्रदेश सांसद शाक्यं नं नुगःखँ तयादीगु खः ।

संघया मूछ्याञ्जे संघरत्न शाक्यं च्वयाः थम्हं सम्पदान यानादीगु सफूया प्रा. तीर्थरत्न शाक्यं समीक्षा यानादीगु खःसा च्वमि शाक्यं सफूया थीथी पक्षयात कयाः थःगु नुगःखँ तयादीगु खः ।

उगु हे ज्याझ्वलय् येँ देय्या शाक्यतय् झिगू महाविहारया दकलय् थकालीम्ह मोतिरत्न शाक्ययात महास्थविर पदं विभूषित याःगु खः । संघया नायः शाक्यं थाय्पाया तपुलिं पुइकाः दोसल्ला न्ययेकादीगु खःसा व न्हूदँ समारोह समितिया नायः प्रा. डा. वज्राचार्यं हनापौ देछानादीगु खः ।