राउतया सम्झौता झन अन्यौल

‘फ्री मधेस’ च्वयाः सम्झौतायात लसकुस !

येँ – स्वतन्त्र मधेसया नारा त्वःताः मूलधारया राजनीति यायेगु धकाः सरकारलिसे सम्झौता याःम्ह डा. सीके राउतं आः नकतिनि सरकारलिसे थःपिंसं यानागु सम्झौतायात मधेसयया जनतां लसकुस याःगु धासें पोष्ट याःगु छपाः किपां धाःसा राजनीतिइ हानं विवाद पिकया बिउगु दु ।

डा. राउतं सरकारलिसे थःपिंसं यानागु सम्झौताया समर्थनय् मधेसी जनतां याःगु दिपावली धकाः पोष्ट याःगु किपाय् हे ‘फ्री मधेस’ धकाः च्वयातःगु दु । डा. राउतं सरकारलिसे ११ बुँदे सम्झौता यायेधुंकाः नं स्वतन्त्र मधेया नारा त्वःतूगु मदुनि धकाः तर्क तयाच्वंपिंत थ्व किपां सरकारया आलोचना यायेत अझ बल बिउगु दु ।

डा. राउतं सम्झौता जूकुन्हु हे जूगु सभाय् न्ववाःबलय् तकं थःपिंसं स्वतन्त्र मधेशया नारा त्वःतागु जुल धकाः स्पष्ट भासं मधाः धकाः आलोचना जुयाच्वंगु दु । लिसें वय्कलं मधेस स्वतन्त्र जुइ लाकि जुइ मखु धकाः जनमत संग्रह यायेमाः धकाः थःपिंसं तया वयाच्वनागु मागयात नं सरकारं स्वीकार याःगु दु धकाः सामाजिक सञ्जालय् धयादीगु खः ।

डा. राउतं धयादीगु थ्व ‘जनमत संग्रह’ वास्तवय् छु खः धकाः नं न्ह्यसः तयेगु याना हःगु दु । म्हिगः प्रतिनिधिसभाया बैठकय् न्ववाःपिं सांसदतय्सं नं सीके राउतलिसे जूगु सम्झौताया खँ अझ स्पष्ट यायेमाः धकाः सांसदतय्सं सः तःगु दु । स्वय्म सत्तारुढ नेपाल कम्युनिष्ट पार्टीया सांसद भीम रावलं नं सम्झौता स्पष्ट मजू धासें डा. राउतं देशया विरुद्ध न्हापा गुलि नं ‘विषय वमन’ याःगु खः, उकियात छुट बी फइ मखु धकाः बिचाः तयादीगु दु ।

उकथं हे नेपाली कांग्रेसया नेतातय्सं नं सीके राउतलिसे जूगु सम्झौता भ्रमपूर्ण जूगु कारणं उकियात स्पष्ट यायेमाः धकाः माग याना हःगु दु ।
उखे डा. राउतयात सञ्चार माध्यमतय्सं स्वापू तयेत स्वःसां स्वापू कायम मजूगु खँ धाःगु दु ।

सम्बन्धित बुखँ

LEAVE YOUR COMMENTS