नेकपा हानं छधी जुइ तिनि ला ?

पार्टी पुनः एकताया लागिं वामदेव गौतमया कुतः जारी

येँ (नेपालभाषा टाइम्स) – विभाजन जुयाः औपचारिक घोषणा जक जुइ ल्यं दनिगु नेकपा छु हाकनं छधी जुइ तिनि ला ?

थ्व सम्भावना आः लगभग समाप्त जुइधुंकल धाःसां जिउ । अथे खःसां नेकपाया वरिष्ठ नेता वामदेव गौतम धाःसा अझं पार्टी एकताया लागिं ब्वाँय् जुयाच्वंगु खँ सीदुगु दु। नेकपा ओली पुचः व नेपाल-दाहाल पुचलय् विभक्त जुइधुंकाः नं गौतम धाःसा गुगुं पुचलय् मवँसे आः तक ‘स्वतन्त्र’ जुयाच्वंगु दनि । वय्कलं थःत स्वतन्त्र धकाः दावी याःसां ओली व नेपाल निम्हं नेतातय्सं अन्ततः दाहाल थःपिनिगु हे पुचलय् वइ धकाः दावी यानाच्वंगु दनि । तर गौतम स्वयमं धाःसा थः गुगुं पुचलय् मवना धासें पार्टी एकताया लागिं कुतः याना हे च्वनागु खँ कनेगु यानादीगु दु। थुकिया लागिं वय्कः गबलें वालुवाटार व गबलें खुमलटार ब्वाँय् जुया च्वनादीगु खँ सीदुगु दु ।

छगू इलय् वामदेव गौतमया लागिं थम्हं राजीनामा बियाः थाय् त्वःता बी धयादीम्ह येँया सांसद लिसें शहरी विकास राज्यमन्त्री रामवीर मानन्धरं नं पार्टी एकताया सम्भावना कायम हे दनि धासें कार्यकर्तायात निराश मजुइत इनाप यानादीगु दु। नेता गौतम आः तक गुगुं पुचलय् मवँसां राज्यमन्त्री मानन्धर धाःसा ओली पुचःया भेलाय् वनेगु याना च्वनादीगु दु ।

गौतमलिसे सतीगु सूत्रतय्सं धाः कथं अझ नं पार्टी एकता जुइफुनि धकाः वय्कलं आशा यानाच्वंगुया निता आधार दु। छता, सर्वोच्च अदालतं संसद पुनस्र्थापनाया घोषणा यात धाःसा चुनावय् वने मालीगु अवस्था वइ मखु, थुकिं पार्टी एकताया सम्भावनायात म्वाकीगु सम्भावना दु। मेता, ओली व नेपाल निगुलिं पुचलं पार्टीया नां व चुनाव चिं थःपिंत हे बीमाः धकाः दावी यानाच्वंगु दु। निर्वाचन आयोगं आः तक उकिया लिच्वः बिउगु मदुनि । बरु आयोगय् ‘नेकपा’ नांयात कयाः ऋषि कट्टेलं न्हापा हे दर्ता यानातःगु उजुरी बारे आयोगया ध्यान वनाच्वंगु दु। यदि आयोगं ‘नेकपा’ धइगु नां कट्टेलयात हे वनी धकाः निर्णय याना बिल धाःसा ओली व नेपाल निगुलिं पुचःयात समस्या जुइफु। अज्याःगु इलय् नं निगुलिं पार्टी हानं छप्पँ जुइगु सम्भावना दनि धइगु गौतमया आशा जुयाच्वंगु दु ।

थ्वहे झ्वलय् मेगु सूत्रं धाः कथं नेकपा विभाजनया अवस्थाय् थ्यनेवं एकताया लागिं नेपाः वःगु चिनियाँ प्रतिनिधि मण्डलया कुतः विफल जूसां चीनं थःगु कुतः धाःसा अझं त्वःतूगु मदुनि । थुकिं यानाः नं आशा ल्यना हे च्वंगु सूत्रया दावी  दु।

सम्बन्धित बुखँ

LEAVE YOUR COMMENTS