पद्मरत्नया प्यदँया पुण्य तिथि
येँ(नेपालभाषा टाइम्स)- नेपाल संवत् सांस्कृतिक आन्दोलनया प्रणेता, नेवाः न्ह्यलुवा नापं मानवअधिकारवादी न्ह्युलवा पद्मरत्न तुलाधरया प्यदँया पुण्य तिथि पद्मरत्न तुलाधर लुमन्ति दिं हन । थनया शंखधर उद्यान दुने च्वंगु वय्कःया झ्वाताय् प्यदँया पुण्य तिथि लाकाः माल्यार्पणलिसें वय्कःयात लुमंकाः उगु दिं हंगु खः ।
पद्मरत्न लुमन्ति गुथि व पद्मरत्न तुलाधर स्मृति राष्ट्रिय प्रतिष्ठानया मंकाः ग्वसालय् जूगु ज्याझ्वलय् येँ महानगरापालिकाया उपप्रमुख सुनिता डंगोलं पद्मरत्न तुलाधरया सक्रियता मदुगु नेपालय् गुगुं नं आन्दोलन धयादिल । आदिवासी जनजाति, पहिचान, अधिकार प्राप्ति गुगुं कथंया नं आन्दोलनय् पद्मरत्न तुलाधरं अग्रणी भूमिका म्हितूगु खँ कुलादिसें उपप्रमुख डंगोलं धयादिल, ‘नेपाल संवत्या सांस्कृतिक आन्दोलन, भाषा आन्दोलन, पहिचानया आन्दोलन जक मखु मानव अधिकार, मिसा अधिकार, मचा अधिकार न्ह्यागु हे आन्दोलनय् नं वय्कःया पूर्ण समर्थन, ग्वाहालि व सक्रिय उपस्थिति दया वयाच्वंगु दु ।’
पुलांम्ह सभामुखलिसें सशस्त्र द्वन्द्वकालय् पद्मरत्न शान्ति वार्ताया निंतिं पहल यानादीम्ह दमननाथ ढुंगानां पद्मरत्न छम्ह विचाःया जक नेता मखसे ‘एक्सन’य् हे कुहां वयाः ज्या याइम्ह नेता जूगु विचाः तयादिल । ‘छिगु थःगु हे संगठन नं दु, उकियापाखें हे ज्या याये धायेवं एक्सन कुहां वइम्ह छम्ह जुझारु व्यक्तित्वः खः’ ढुंगानां धयादिल ।
पद्मरत्न तुलाधरया चिधिकःम्ह म्ह्याय् सुम्निमा तुलाधरं थः अबुं देय्न्यंकंया हरेक धइथें आन्दोलनय् ब्वति कायेगु जक मखु समग्र आन्दोलनकारीयात हे गौरवान्वित यायेगु यानादीगु खँ लुमंकादिल ।
सभापतिया थासं पुलांम्ह मन्त्री डा. केशवमान शाक्यं पद्मरत्न थःगु निंतिं अभिभावक सरह जूगु विचाः तयादिसें थः सरकारी जागिर नयाच्वनागु इलय् नेपालभाषा मंकाः खलकय् ज्या यायेत इनाप यानागु घटना लुमंकादिल ।
गुथिपाखें उगु इलय् हालय् दिवंगत जुयादीपिं वाङ्मय शताब्दीपुरुष सत्यमोहन जोशी व आदिवासी जनजाति प्रतिष्ठानया महासचिवलिसे आदिवासी जनजाति न्ह्यलुवानापं मानवशास्त्री डा. ओम गुरुङया किपाय् नं स्वां देछासे श्रद्धाञ्जली देछाःगु खः ।
थुकथं हे नेपाल संवत् न्हूदँ राष्ट्रिय समारोह समितिं नं नेवाः न्ह्यलुवा पद्मरत्न तुलाधरया प्यदँया पुण्य तिथिइ लाकाः उगु हे थासय् ज्याझ्वः याःगु दु । ज्याझ्वलय् समारोह समितिया नायः प्रा. डा. नरेशमान वज्राचार्यं पद्मरत्न तुलाधरं यानादीगु थीथी पक्षनापं वय्कःनापया लुमन्तिया खँ कनादीगु खः ।
ज्याझ्वलय् समारोह समितिया दुजःलिसें भाषाह्यमिपिंसं तुलाधरया झ्वाताय् स्वां देछानाः श्रद्धा प्वंकादीगु खः ।
LEAVE YOUR COMMENTS