ने. सं. ११४४ कौलाथ्व पारू - नःलास्वनेगु

यम्पि बिहारय् कुरकुल्ले डाकिनी पुजा

यल (नेपालभाषा टाइम्स)- यलया नीस्वसःदँ पुलांगु प्राचीन सुनयनश्री मिश्र संस्कारित यम्पि महाबिहार (ई बहि) य् तथागत अरहत सम्यक सम्बुद्धं धर्म देशना यानाबिज्याःगु पुनित महिनाया लसताय् श्रद्धेय लामागुरु दिल्गो खेन्चे रिम्पोछेया प्रमुख आचार्यत्वय् न्हय्चा च्यान्हु यंकयया कुरकुल्ले (जोगीनी) डाकिनीया पुजा जुयाच्वंगु दु । उगु पुजा कन्हय् मंगलबाः क्वचाइ ।

पुजा शुरु यायेगु झ्वलय् विनयचार्य श्रद्धेय भद्दिय महास्थविर भन्तें थीथी देशं वःपिं नापं उगु पुजाय् सहभागी जुयाच्वंपिं उपासक–उपासिकापिंत आशिरवचन बियाबिज्याःगु खः ।

सुनयनश्री मिश्रं छगू हे मुल बिहारनाप स्वाकाः न्हय्गू झ्वःलाक्क बिहार दयेकूगु मध्ये थौंकन्हय् यम्पि (ई बहि), सुजतप्रभा (करुणाचुक) व यन्ताकर्ण यानाः स्वंगू बिहारजक अस्तित्वय् दुगु व सुजतप्रभा बिहारय् पद्मसंभवं (गुरु रिम्पोछें) खुला तक ध्यान यानाबिज्याःगु जानकारी नापनापं अनया यन्ताकर्ण बिहारय् थेरवादया विनयचार्य श्रद्धेय भद्दिय महास्थविर भन्ते नीस्वदँ न्ह्यनिसें च्वना बिज्याना नित्यकथं थेरवाद धर्म अभ्यास याना/याकाः वयाच्वंगु, अथेहे करुणा चुक बिहारय् लय्लय्पतिकं पद्मवर्ण महायान बिहार (ज्याथा बहाः) या श्रद्धेय गुणसागर भन्ते पाखें महायान धर्म अभ्यास याना/याकाः वयाच्वंगु व थुकथं हे यम्पि महाबिहारय् पञ्चस्थविर आजुपिंसं बज्रयान कथं नित्य धर्म अभ्यास याना/याकाः वयाच्वंगुलिं उगु बिहारय् आः हलिंमय् अस्तित्वय् दयाच्वंगु थेरवाद, महायान व बज्रयान –स्वंगुलिं यानकथंया धर्म अभ्यास जुयावयाच्वंंगु खँ यम्पि महाविहार सुधार समितिया अध्यक्ष आशारत्न (गम्भिर) शाक्यं कनादिल । तर थुगु बिहारय् थज्याःगु कुरकुल्ले पुजा न्हापांखुसि जूगुलिं बिस्कं महत्वपुर्ण जूगु खँ नं वय्कलं न्ह्यथनादिल ।

सुनयनश्री मिश्रं उगु इलय् खुगू करोड दां फुकाः यम्पि महाबिहार दयेकूगुलिं वय्कःयात षतकोटी आजु धकाः अनया स्थानीय मनूतयसं धयावःगु व आः वया ‘षतकोटी आजु’ शब्द अपभ्रंश जुयाः खतांआजु जूवंगु खः । गुंलाबलय् खतांआजु स्वःवनेगु चलन आः नं न्ह्यानाच्वंगु दनि । भारतंय् बुद्धधर्मया अवसान न्ह्यः तक अनं नेपालय् बौद्ध आचार्य (पंडित)पिं वये–वनीगु जुया च्वनिगु खः । उगु हे झ्वलय् दकलय् लिपा वम्ह बौद्ध आचार्य वनरत्न नं थ्वहे बहिली च्वंगु खः धाइ ।