विश्व बौद्ध भातृत्व संघय् नेपाः उपाध्यक्षय् विजयी

येँ(नेपालभाषा टाइम्स)- विश्व बौद्ध भातृत्व संघ (डब्लुएफबी)या उपाध्यक्षय् नेपाः विजय जूगु दु । थाइल्याण्डया राजधानी बैंककय् अक्टोबर १७ निसें २१ तक जूगु ३० क्वःगु विश्व बौद्ध सम्मेलनय् धर्मोदय सभाया उपाध्यक्षलिसें नेपाःया प्रतिष्ठित उद्योगपति पद्मज्योति निर्वाचित जुयादीगु खः ।

सम्मेलनय् नेपाःपाखें धर्मोदय सभाया न्याम्ह व लुम्बिनी विकास कोषया सदस्य सचिव सानुराजा शाक्यलिसें न्याम्ह दुजःपिनिगु प्रतिनिधिमण्डलं ब्वति कयादीगु खः ।

थ्व स्वयां न्ह्यःया कार्यकालय् नं उपाध्यक्ष जुयाच्वनादीम्ह पद्मज्योति अत्याधिक मत हयाः निर्वाचित जुयादीगु धर्मोदय सभां जानकारी बिउगु दु ।
सम्मेलनय् धर्मोदय सभाया सल्लाहकार रत्नमान शाक्य वातावरण समितिया सभापतिइ व केन्द्रीय दुजः मीराज्योति मिसा समितिया सभापतिइ निर्वाचित जुयादीगु दु ।

विश्व बौद्ध भातृत्व संघं नेपालय् निक्वःतक विश्व बौद्ध सम्मेलन यायेधुंकूगु दु । संघं प्यक्वःगु व झिंन्याक्वःगु विश्व बौद्ध सम्मेलन नेपालय् याःगु खः ।