येँ महानगरया वडास्तरय् खोप केन्द्र

येँ – येँ महानगरपालिकां वइगु जेठ २५ गतेनिसें महानगरया दक्वं वडाय् कोरोना भाइरस (कोभिड–१९) विरुद्धया खोप केन्द्र संचालन याइगु जूगु दु । उकिया निंतिं येँ महानगरया शहरी स्वास्थ्य व खाद्य पदार्थ नियमन विभागं दक्वं वडायात खोप केन्द्र संचालन जुइगु थाय् (केन्द्र)या नां क्वःछिनाः छ्वया हयेत इनाप याःगु दु ।
स्वास्थ्य तथा जनसंख्या मन्त्रालयया जेठ १८ गतेया निर्णयकथं येँ महानगर सहरी स्वास्थ्य विभाग व जिल्ला स्वास्थ्य ज्याकूया दथुइ जूगु छगू बैठकं महानगरया दक्वं वडाय् खोप केन्द्र संचालन यायेगु निर्णय याःगु खः । उगु हे निर्णयया लिधंसाय् दक्वं वडाया खोप केन्द्र क्वःछिनाः छ्वया हयेत विभागं पत्राचार याःगु खः ।

सरकारं थ्व हे वइगु जेठ २५ गतनिसें ६० दँनिसें ६४ दँ तक उमेर समूहयात चिनिया खोप ‘भेरोसेल’या न्हापांगु मात्रा बीत्यंगु दु । थुगु खोप ज्याझ्वः अन्तर्गत न्हापांखुसी कोरोनाया महामारी पनेत अग्रपंक्तिइ खटे जूपिं, अनंलिपा ६५ दँ च्वय्या उमेर समूह, स्वंगू चरणय् १८ दँनिसें ५९ दँतकया उमेर समूहयापिंत खोप बिउगु खः ।

थ्व स्वयां न्ह्यः थुपिं व्यक्तिपिंत उपलब्धताया लिधंसाय् चिनिया खोप ‘भेरोसेल’ व भारतीय खोप ‘कोभिसिल्ड’या न्हापांगु मात्रा बिउगु खः । थुकथं खोप बिउगु इलय् यक्वसिनं निगूगु मात्राया खोप काःगु खःसा गुलिसिनं न्हापांगु मात्रा जक काये खंगु खः । कोभिसिल्डया न्हापांगु मात्रा काःपिंसं निगूगु मात्राया खोप कायेखंगु मदुनि ।

वंगु बैशाख २२ गते मन्त्रालय व बैशाख २५ गते जिल्ला विपद् व्यवस्थापन केन्द्रया निर्णयकथं महानगरपालिकां जेठ २ गतेनिसें महानगरया दक्वं वडाय् भेरो सेलया निगूगु मात्राया खोप बिउगु खः । जेठ ११ गते तक संचालन जूगु ज्याझ्वलय् छगू लाख स्वयां अप्वःसिनं खोप काःगु खः ।