पहिचानया खँल्हायेत समिति, ‘कोशी प्रदेश’ नां हिलेत कोइराला तयार
येँ (नेपालभाषा टाइम्स)- १ नम्बर प्रदेशया नां ‘कोशी’ तःगु विरुद्ध आन्दोलन यानाच्वंगु पक्षलिसे वार्ता यायेत सरकारं नीस्वंगु वार्ता समितिया संयोजक लिसें भौतिक पूर्वाधार मन्त्री कमलप्रसाद जबेगुं पहिचान पक्षधरतय् माग पूवंकेत थाकुइगु खँ धयादीगु दु ।
म्हिगः विराटनगरय् पत्रकार सम्मेलन यासें जबेगुं पहिचान पक्षधरं तःगु माग मध्ये संविधानसम्मत माग जक पूवंके फइगु खँ कनादीगु दु । वय्कलं धयादिल, ‘पहिचान पक्षधरया माग पूवंकेत मछिंगु अवस्था दु, उकियात सरकारं गुलि तक लचकता क्यने फइ स्वये मानि ।’ पहिचान पक्षधरतलिसे वार्ता यायेगु लागिं सरकारं म्हिगः तिनि सरकारं वार्ता समिति गठन याःगु खः ।
वंगु फागुनय् प्रदेशसभाया स्वब्वय् निब्व सदस्यतय् बहुमतं प्रदेशया नां ‘कोशी’ तःगु खः । उगु नांयात विरोध यानाच्वंगु थीथी राजनीतिक दल लिसें जातीय संघसंस्था पहिचानया आधारय् नां तयेमाःगु माग यासें निरन्तर आन्दोलन याना वयाच्वंगु दु ।
वार्ता समितिया संयोजक जबेगुं पहिचान पक्षधरया माग गुलि तक पूवंके फइ, उकियात सरकारपाखें भतिचा हे कञ्जुस्याइँ मयासे शान्तिपूर्ण अवतरण यायेगु कुतः यायेगु खँ नं धयादीगु दु । उकथं हे वय्कलं पहिचान पक्षधरतलिसे वार्ता याये न्ह्यः प्रदेश सरकार व प्रदेशसभाय् दुगु दलतलिसे नं सहलह यायेगु खँ धयादीगु दु । उकथं हे वय्कलं वार्ता समितिया छुं न्हिं लिपा हे बैठक च्वनेगु व वयां लिपा आन्दोलनरत पक्षयात आधिकारिक रुपय् वार्ताय् सःतेगु खँ नं धयादीगु दु । वंगु शनिवाः प्रदेशया मुख्यमन्त्री केदार कार्कीं जबेगुया संयोजकत्वय् वार्ता समिति नीस्वंगु खः ।
थ्वहे झ्वलय् कांग्रेसया नेता शेखर कोइरालां पहिचान सहित नामाकरणया माग यासें आन्दोलन यानाच्वंपिं नेतातय्त नापलाःगु दु । कोइरालां आन्दोलन यानाच्वंपिंत थःगु हे छेँय् सःताः म्हिगः सहलह यानादीगु खः ।
आन्दोलनकारीतलिसे खँ ल्हायेगु झ्वलय् नेता कोइरालां प्रदेशया नां जबरर्जस्ती तःगु व उकिया बारे थः जानकार दु धासें धयादिल, ‘छिकपिनिगु माग जायज दु, संसारया आपालं संघीयताय् पहिचानया आधारय् नामाकरण जूगु दु । जिं ला बरु पहिचानया आधारय् नां मजुइगु खःसा प्रदेश १ हे तयाति धयागु खः । तर जबर्जस्ती नामाकरण याःगुलिं प्रदेशय् तनाव ब्वलन । हाकनं नां तयेगु खँय् जिगु सहमति दु । जिं थःगु थासं ग्वाहालि याये ।’
भारतीय संघीयताया उदाहरण बिसें नेता कोइरालां धयादिल, ‘भारतीय संघीयताय् नं जातीय व सांस्कृतिक पहिचान निश्चित यानातःगु दु । भाषा व लिपियात नं सुरक्षित यानातःगु दु । संघीयताया आधारभूत खँ वहे खः । थन जबर्जस्ती यानाः गलत याःगु दु । थुकियात भिंकेगु खँय् जिगु नं भूमिका दइ ।’
LEAVE YOUR COMMENTS