बाखं च्वमि साय्मिया ‘पलाः’ बाखं मुना पिदन

येँ- नेपालभाषाया बाखं च्वमि मय्जु प्रमिला साय्मिया न्हूगु बाखं मुना सफू ‘पलाः’या पितब्वज्या जुल । जूम प्रविधिया माध्यमं जूगु ज्याझ्वलय् भाषासेवी नापं उद्योगपति लक्ष्मीदास मानन्धरं सफूया पितब्वज्या यानादीगु खः ।

सफूया पिकाकः नेपालभाषाया पुलांगु साहित्यिक संस्था च्वसापासाया नायः लिसें नांजाःम्ह साहित्यकार भूषणप्रसाद श्रेष्ठया सभापतित्वय् जूगु ज्याझ्वलय् सफूया पितब्वज्या यासें मानन्धरं १०० पाः सफू थम्हं न्याना बीगु नं घोषणा यानादीगु खः । पितब्वज्या जूगु सफूयात कयाः नांजाःम्ह समालोचक प्रा. प्रेमशान्ति समीक्षा यानादीगु ज्याझ्वलय् बाखं च्वमि मानन्धरं भावुक जुयाः थःगु नुगःखँ प्वंकादीगु खः ।

ज्याझ्वलय् नांजाःम्ह आख्यानकार मथुरा साय्मि, सभापति श्रेष्ठ, नांजाःम्ह कवयित्री प्रतिसरा साय्मि लगायतया भाषाह्यमिपिंसं नं थःगु नुगःखँ तयादिसें भिंतुना बियादीगु खः ।

ताःई न्ह्यवंनिसें अमेरिकाय् च्वना वयाच्वनादीम्ह बाखं च्वमि साय्मिं करिब पीन्यादँ पीखुदँ लिपा थःगु न्हूगु बाखं मुना सफू ज्वनाः हाकनं पिलू वःगु खः । वय्कःया न्हूगु बाखं मुना सफुतिइ न्हूगु व पुलांगु यानाः मुक्कं झिंप्यपु बाखं दुथ्यानाच्वंगु दु ।

ज्याझ्वः अमेरिकाया शिकागोय् च्वनादीम्ह बाखं च्वमि केशरमान ताम्राकारं न्ह्याकादीगु खः ।