थुकथं वःगु जुयाच्वन थौंया विदा

येँ (नेपालभाषा टाइम्स)- वाङमय शताब्दी पुरुष सत्यमोहन जोशी मदुगु दुःखय् सरकारं थौं सार्वजनिक बिदा घोषणा याःगु दु । सरकारं थ्व विदा म्हिगः हे बिउगु जुइ धकाः सुथंनिसें चर्चा जुयाच्वंगु खः । वहे विदाया हल्लां यानाः म्हिगः गुलिखे स्कुलत तकं बन्द जूगु खः । तर विदा धाःसा थौं जक बीगु निर्णय जूगु दु ।

सत्यमोहन जोशीयात अन्तिम श्रद्धाञ्जलि प्वंकेत यल महानगरपालिका झाःम्ह संस्कृति मन्त्री जीवनराम श्रेष्ठं अन हे थ्व विदा बीकेगु लागिं पहल यायेगु जानकारी बियादीगु जुयाच्वन । लिसें वय्कलं थुकिया लागिं प्रधानमन्त्री शेर बहादुर देउवायात नं कन्भिन्स यानादिल । तर म्हिगः विदा बीगु खःसा म्हीग हे उकिया लागिं तयारी यायेमाल । सार्वजनिक बिदा बीकेत संस्कृति मन्त्रालयं इनाप याःगु खःसां विदा बीगु ज्या धाःसा गृह मन्त्रालयं याइगु खः । म्हीग गृह मन्त्री बालकृष्ण खाँण नं स्वनिगलय् मदुगु लानाच्वन । उकिं म्हिगः हे विदा बीगु ज्या न्ह्याये मखन ।

मेखे म्हिगः नेपाल प्रहरीया ‘प्रहरी दिवस’ नं लानाच्वन । राष्ट्रिय शोकया न्हि कुन्हु अज्याःगु दिवस न्यायेकेगु पाय्छि जुइ मखु, तर दिवसया सम्पूर्ण तयारी पूरा जुइधुंकल धइगु गृहया इनाप वसेंलि विदा छन्हु लिपा जक बीगु निर्णय जूगु खः । वहे कथं म्हिगः प्रहरी दिवसया औपचारिक ज्याझ्वः क्वचायेधुंकाः गृहपाखें सुचं जारी यासें थौं बिदाया जानकारी याःगु खः ।

वय्कः मदुगु दुःखय् राज्यं थौं राष्ट्रिय शोक माने यासें राष्ट्रिय ध्वाँय् क्वस्वयेकेगु निर्णय याःगु दु । लिसें थौं विदेशस्थित नेपाःया कुटनीतिक नियोगया ज्याकूत नं बन्द जुइगु खँ धाःगु दु ।