नेपाल आदर्शय् पुलांम्ह प्रअया झ्वाता

येँ – नेपाल आदर्श माध्यमिक विद्यालयय् लगातार प्यंगू दशक तक प्रधानाध्यापक जुयाः सेवा यानादीम्ह स्व. हरिशंकर श्रेष्ठया झ्वाता नेपाल आदर्श मावि दुने धस्वाकूगु दु । शनिवाः छगू ज्याझ्वःया दथुइ वाङ्मय शताब्दीपुरुष सत्यमोहन जोशीं उगु झ्वाताया उलेज्या यानादीगु खः ।

ज्याझ्वलय् न्ववासें शताब्दीपुरुष जोशीं नेपाल आदर्श विद्यालयपाखें देय्या थीथी ख्यलय् सक्रिय जुयाच्वंपिं नांजाःपिं व्यक्तित्वत उत्पादन याःगु खँ न्यनेदयाः थः लय्तायागु खँ कनादिल । विद्यालयया पुलांम्ह प्रधानाध्यापक लिसें विद्यालय व्यवस्थापन समितिया अध्यक्ष शारदाभक्त श्रेष्ठं पुलांम्ह प्र.अ. हरिशंकर श्रेष्ठं विद्यालय विकासया लागिं यानादीगु योगदानया चर्चा यानादिल ।

ज्याझ्वलय् नेपाल आदर्श माविया निर्वतमान प्र.अ. वरुणप्रसाद वैद्य, वर्तमान प्र.अ. रविन रन्जित लिसें मदुम्ह प्र.अ. हरिशंकर श्रेष्ठया कायभाजु ओमशंकर श्रेष्ठं नं नुगःखँ तयादीगु खः । श्रेष्ठया छेँजःपाखें वय्कःया नामं ‘हरिशंकर शिक्षा पदक’ पलिस्था यायेगु घोषणा नं जूगु खः । उगु हे ज्याझ्वलय् शताब्दीपुरुष सत्यमोहन जोशीयात दोसल्लां न्ययेकुसें अभिनन्दन यायेगु ज्या नं जूगु खः ।

वय्कःयात विद्यालय व विद्यार्थी परिवारलगायत वडा नंं २२ या वडा अध्यक्ष चिनिकाजी महर्जनं अभिनन्दन यानादीगु खः । नेपाल आदर्श विद्यार्थी परिवारया नायः करुणा शाक्यया सभापतित्वय् जूगु उगु ज्याझ्वलय् सचिव रामकृष्ण श्रेष्ठं लसकुस यानादीगु खःसा उपाध्यक्ष केदारेश्वरमान स्थापितं सुभाय् बियादीगु खः । ज्याझ्वलय् झ्वाता पलिस्था यायेत आर्थिक यानादीपिं दातापिं, झ्वाता पलिस्था उपसमितिया दुजःपिं व विद्यार्थी परिवारया पदाधिकारीपिंत नं हनेगु ज्या जूगु खः ।