समानुपातिक समावेशी धंगं ज्या याये सुयातं पक्षपात याये मखु- राजा शाक्य (स्वतन्त्र)
राजा शाक्य (स्वतन्त्र)
उम्मेदवार, येँ क्षेत्र नं. ८ (२)
प्रचार प्रसार गुकथं जुयाच्वंगु दु ?
प्रचार प्रसार बांलाक हे जुयाच्वंगु दु । घरदैलो, क्वथा मुँज्या, मतदातानाप लायेगु, भेटघाट, अन्तक्र्रिया, सहलह लिसें मेमेगु नं थीथी माध्यमं प्रचार प्रसार बांलाक जुयाच्वंगु दु । गुकथं जिउ उकथं प्रचार प्रसारयात याना वयाच्वनागु दु ।
जनताया प्रतिक्रिया गज्याःगु दुगु खंकादिया ?
जनताया प्रतिक्रिया बांलाः हे जू । २५ दँ न्ह्यःनिसें सामाजिक ख्यलय् ज्या यानाच्वनागु नापं सुरक्षा, प्रशासन व स्थानीय निकायनाप समन्वय यानाः थीथी ज्याझ्वः याना वयाच्वनागुलिं थनया जनतां विश्वास यानाच्वंगु दु । जिगु ज्यायात कयाः मतदातातय्सं सही मूल्यांकन याइ धइगु जितः विश्वास दु ।
छितः हे त्याकेमाःगुया कारण छु ?
मुख्य रुपं ला थनया आवश्यकतायात ध्यानय् तयाः जिं ज्वनागु मुद्दा हे प्रमुख कारण खः । थौंकन्हय् युवा उम्मेदवारया पक्षय् नं जनलहर खने दयाच्वंगु व उकिसन छम्ह युवा उम्मेदवार जूगुलिं नं जनतां जितः अत्याधिक मत बियाः त्याकी धइगु विश्वास दु । जिं ज्वनागु मुद्दा पूवंकेत व उकिया कार्यान्वयन यायेत नं जिं प्रदेशसभाय् वनेमाःगु आवश्यक दु ।
चुनावय् छिगु एजेन्डा छु ?
मुख्य रुपं खुगू विषययात एजेन्डा दयेकागु दु । गुगु थुकथं दु । शिक्षा, स्वास्थ्य, विकास, सुशासन, रोजगारी व समृद्धि । युवा लक्षित विशेष योजना हयाः आत्मनिर्भर यायेगु । विश्व सम्पदाय् दुथ्याःगु स्वयम्भूयात पर्यटन क्षेत्रया रुपय् विकास यायेगु, नवीकरणीय उर्जा, स्वच्छ वातावरण, सुलभ यातायात, उद्यमशीलता, अनुसन्धन व प्रशिक्षण केन्द्र निर्माण व डिटिजल माध्यमं भ्रष्टाचार मुक्त समाज निर्माण यानाः पारदर्शी, जवाफदेही, विधिया शासन, उत्तरदायी, समतामूलक समाज निर्माण मुख्य मुद्दा खः ।
त्याइगु सम्भावना गुलि दु, दुसा आधार छु खः ?
सकसिनं जिगु ज्यायात च्वछाये यानाच्वंगु दु, उलि हे विश्वास नं यानाच्वंगु दु । जिगुपाखें आशा यानाच्वंगु दु । न्हापा हे स्थानीय जनप्रतिनिधि जुइमाःम्ह आः प्रदेशय् वनाः जिमिगु सेवा यायेगु स्व धकाः यक्वसिनं धायेगु यानाच्वंगु दु । उकिं गुकथं वय्कःपिंसं जिप्रति विश्वास यानाच्वंगु दु । थ्व हे जि त्याइ धइगु आधार खः ।
छि प्रदेशसभाय् त्याना वन धाःसा छु छु ज्या यानादी ?
प्रदेशय् वनेगु धइगु नीति व कानून निर्माणया निंतिं खः । उकिया निंतिं प्रदेश अनुकूल नीति व कानून निर्माणया निंतिं भूमिका म्हिते । सांसद विकास कोषपाखें विकास निर्माणया ज्या पक्षपात मयासे समावेशी धंगं याये । बुँदागत रुपं धायेगु खःसा ल्याय्म्हतय्त आत्मनिर्भर यायेगु, संस्कृति, परम्परा, संस्कार, साक्षरता, ज्ञान शीपया शैक्षिक स्तरय् अभिवृद्धिया निंतिं पहल याये । सहरी सुरक्षा, सतक, धः, त्वनेगु लः, मत आदिया समुचित व्यवस्थाया निंतिं पहल याये । खाली जग्गाया संरक्षण, पार्क निर्माण, पर्यटन, स्वास्थ्य ख्यःया विकास, सम्पदा संस्कृतिया संरक्षणया निंतिं भूमिका म्हिते ।
LEAVE YOUR COMMENTS