कृषकतय्त सितिकं वा पुसा इन

ख्वप – ख्वप नगरपालिकां किसानतय्त सितिकं वा पुसा इना बिउगु दु । वा पीगु मौसम न्ह्यःने थ्यंगु इलय् नगरपालिकां नगरबासीतय्गु भावना कथं सितिकं वा पुसा इना बिउगु खः ।प्रत्येक वडा ज्याकुथिइ वडा कृषक समितिपाखें वैशाख १६ गतेनिसें प्रति परिवार साढे २ किलोया ल्याखं वा पुसा व वासः इनेज्या जूगु नगरापालिकां न्ह्यथंगु दु ।

नेपाली कृषि वैज्ञानिकतय्गु अनुसन्धानं सिफारिस याःगु ताइचिन ११ जातया वा राष्ट्रिय कृषि अनुसन्धान ज्याकू खुमलटारं मुंकाः नगरपालिकां इनेज्या यानागु समितिया संयोजक राजकृष्ण गोरां कनादिल । कृषकतय्सं बाली लगे यायेधुंकाः थुकिं हे पुसा पिकाये फइगु व चिनिया हाइब्रिड थें पुसाया लागिं थप न्याये मालिगु समस्या मजुइगु वय्कलं कनादिल ।

ख्वप नगरपालिका वडा नं. १ य् १५ गतेनिसें हे थथे पुसा इनेगु सुरु यानागु वडा अध्यक्ष श्यामकृष्ण खत्रीं कनादिल । छुं छुं वडाय् धाःसा बैशाख १६ गतेनिसें १९ गते तक नं वा पुसा इनेज्या जूगु खः । उन्नत जातिया ताइचिन वाया पुसा जूगुलिं आपालं बाली सइगु व थःगु हे बुँइ पुसा नं काये फइगु जुयाः वा पुसा कायेत वडाय् आपालं किसानतय् भीड जूगु खः ।

वा पुसा काइपिं कृषकतय्सं थःगु नागरिकताया प्रतिलिपि व लालपूर्जाया प्रतिलिपि नापं वडा ज्याकुथिइ निवेदन बीमाःगु व वडाया जनप्रतिनिधितय् सिफारिसय् वा पुसा इनेगु ज्या जुयाच्वंगु संयोजक गोरां कनादिल ।