चीनय् न्हापांखुुसी कूछि भ्वय्
येँ (नेपालभाषा टाइम्स)- नेपाःया उत्तरी जःलाखःला देय् चीनय् न्हापांखुसी कूछिभ्वय् न्यायेकूगु दु । मोहनि नखःया च्यान्हुया दिं अस्तमिकुन्हु नेवाःतय् थः कूलया छेँजःपिं भ्वछिं च्वनाः कूछिभ्वय् नयेगु चलन दु । अस्तमिकुन्हु चीनय् न्हापांखुसी अन च्वनाच्वंपिं नेपाःमितय्सं कूछि भ्वय् न्यायेकूगु खः ।
चीनया दक्षिण पूर्वी चच्याङ प्रान्तया यिऊ सहरय् च्वना वयाच्वंपिं नेपाःमित सकलें जानाः कूछिभ्वय् न्यायेकूगु खः । चीनय् च्वना वयाच्वंपिं नेपाःमिपिंसं नेपाःया संस्कृतियात चिनिया नागरिक समक्ष प्रवद्र्धन यायेगु ल्याखं थीथीकथंया ज्याझ्वःत याना वयाच्वंगु दु । थ्व हे झ्वलय् मोहनिया च्यान्हुया दिं यिऊ सहरय् च्वंपिं नेवाःतय्सं थीथी झिंगुताजिया नसाज्वलं दयेकाः नेपाःमिलिसे चिनिया नागरिकयात कूछिभ्वय् नकूगु खः ।
यिऊ सहरया नेपाःमिपिंसं बजि, माय्वः, ख्यें, कुँन्या, केरा, आमाःसि, फसि, भुति, पलः, कय्गू, वाउँचा, खय्पि, चय्पि, दायेकाला, हिघासा, छ्वय्ला, थ्वँ, धौ आदि ज्वलं तयाः कूछि भ्वय् न्यायेकूगु खः ।
चीनया यिऊ सहरस्थित चीन च्याम्बर्स अफ कमर्स व गैरआवासीय नेपाली संघ निगू संस्थाया संयोजनय् थुकथं कूछिभ्वय् नकेगु ज्या जूगु खः । थुपिं निगू संस्थापाखें मोहनि, स्वन्तिलिसें नेपाःया थीथी नखःचखःया इलय् नसाज्वलं दयेकाः नयेगु, नकेगु नापं थीथीकथंया ज्याझ्वःत ग्वसाः ग्वया वयाच्वंगु चीनय् च्वना वयाच्वनादीम्ह विष्णुप्रसाद दुमरुं कनादीगु दु । वय्कःयाकथं थगुने मोहनिया नखःया इलय् गुँभ्वय् न्यायेकाः नेवाः परिकार नकेगु ज्या जूगु खः ।
चीनय् कोभिड–१९ या कारणं कडा नीति लागू यानातःगुलिं यक्व नेपाःमिपिं मुनाः न्यायेके मखंसां सीमित नेपाःमि व चिनिया नागरिक दथुइ कूछिभ्वय् न्यायेकेगु ज्या जूगु दुमरुं कनादीगु दु । चीनय् च्वनाः थःगु व्यवसाय याना वयाच्वनादीम्ह नापं गैरआवासीय नेपाली संघ चीन शाखाया सहकोषाध्यक्ष तकं जुयाच्वनादीम्ह रवीन्द्रकुमार मालीया छेँय् सकलें मुनाः कूछिभ्वय् न्यायेकूगु खः । करिब पीम्हेसिया सहभागिता दुगु भ्वजय् बछि नेपाःमि व बछि चिनिया नागरिकया सहभागिता दुगु खः ।
थकालिम्ह दकलय् न्ह्यःने च्वनाः वयांलिपा छसिकथं झ्वःलिक च्वनाः कूछिभ्वय् नयेगु परम्पराकथं चीनय् च्वंपिं नेवाःतय्सं नं उकथं हे परम्परा नालाः भ्वय् नयेगु ज्या याःगु खः । मालीया पाजु वु स्याओ हु थकालि जुयाः कूछि भ्वय् नःगु खःसा दकलय् क्वय् मालीया मल्जु नाम छन सी छाङ च्वनादीगु खः ।
अथे हे नवमिकुन्हु यिऊ सहरया नेपाःमिपिं सकसिनं थःथःगु सवारी साधनलिसें थीथी हलंज्वलंया नं पुजा याःगु खः । चीनय् नेपाःमिपिंसं मोहनिया इलय् थुकथं सवारी साधन पुजा याःगु नं थ्व न्हापांखुसी खः ।
LEAVE YOUR COMMENTS