सरस्वतीया उजुरी दर्ता मजू

येँ – जातीय भेदभाव याःगु द्वपं लानाच्वंम्ह येँया छेँथुवाः मय्जु सरस्वती प्रधानं थःत रुपा सुनारं गलत द्वपं बियाः प्रहरी हिरासतय् तःगु धासें बीत स्वयादीगु उजुरी अझं दर्ता याये मफुनि । थीथी प्रहरी चौकीइ उजुरी दर्ता यायेगु कुतः यानाः नं सफल मजूगुलिं म्हिगः सरकारी वकिलया ज्याकुथी दर्ताया कुतः जूगु खः । तर वकिलया ज्याकुथिं मय्जु प्रधानं बियादीगु उजुरी अध्ययन निं याना स्वये धासें बुझे यानाः धाःसां दर्ता धाःसा मयाःगु खँ धाःगु दु । म्हिगः वय्कः नेवाः अभियन्तापिनि पुचः सहित सरकारी वकिलया ज्याकुथी झाःगु खः ।

अथे हे राष्ट्रिय मानव अधिकार आयोगं थ्व विषयय् पिकाःगु वक्तव्यय् मय्जु प्रधानयात दोषी खः धकाः किटान यानातःगु खँय् नं प्रधानं आपत्ति प्वंकादीगु दु । अदालतं किटान मयाःगु खँ आयोगं किटान यानाः दोषी धकाः थःगु वक्तव्यय् उल्लेख याःगु कारणं प्रधानं थुकिया विरुद्ध नं सर्वोच्च अदालतय् रिट तयेगु तयारी यानाच्वंगु खँ सीदुगु दु । थ्व प्रकरणय् सक्रिय जुयादीम्ह नेवाः अभियन्ता शैलेश शाक्य बरेजुं ‘नेपालभाषा टाइम्स’ यात कनादी कथं आः निन्हु स्वन्हुया दुने हे आयोग विरुद्ध रिट तयेगु तयारी जुयाच्वंगु दु ।