जुन ज्वनाः वल जुनु श्रेष्ठ

येँ(नेपालभाषा टाइम्स)- नेपालभाषा सांगीतिक ख्यलय् छगू इलय् अतिकं लोकंह्वाःम्ह म्येँ हालामि जुनु श्रेष्ठ ताःई लिपा हाकनं थ्व ख्यलय् खने दयेकः वःगु दु । नेवाः सांगीतिक ख्यलय् थःगु हे बिस्कं म्हसीका दुम्ह म्येँ हालामि श्रेष्ठ ताःई तक थ्व ख्यलं तापानाच्वंगु खःसा लिपांगु इलय् वय्कः ‘जुन’ नांया म्येँचाःलिसें हाकनं थ्व ख्यलय् खने दयेकः वःगु खः ।

छुं दिं न्ह्यः थन जूगु छगू ज्याझ्वःया दथुइ म्येँ हालामि जुनु श्रेष्ठया ‘जुन’ नांया म्येँचाःया पितब्वज्या याःगु खः । ख्यालिजुजु मदनकृष्ण श्रेष्ठ व नांजाःम्ह म्येँ हालामि दीप श्रेष्ठं मंकाःकथं उगु म्येँचाःया पितब्वज्या यानादीगु खः ।

पितब्वज्या जूगु म्येँचालय् जी. शाह, जनकवि दुर्गालाल श्रेष्ठ, बद्री वेदना, सरला श्रेष्ठ, गोविन्द ह्यूमतं च्वयादीगु म्येँ दुथ्यानाच्वंगु दु । म्येँचालय् दुथ्याःगु म्येँय् अनिल शाही, गोविन्द ह्यूमत, दिपेन्द्रमान सिंह लगायतं लसय् हनादीगु दुसा संगीत संयोजन जीवित जल्मीं यानादीगु खः ।

म्येँ हालामि श्रेष्ठया ‘लुमंका जिं च्वनाः नुगलय् छंगु किपा तयाः’, ‘जिगु नुगलय् घाः यानाः …’, ‘मन जिगु उइँ जुल’ छगू इलय् अतिकं लोकंह्वाःगु म्येँ खः ।