अमेरिकाय् टिकटकय् प्रतिबन्ध तयेगु घोषणा

एजेन्सी – अमेरिकी राष्ट्रपति डोनाल्ड ट्रम्पं चिनियाँ लगानीया भिडियो साझेदारी एप टिकटकय् प्रतिबन्ध तयेगु घोषणा यानादीगु दु । वय्कलं याकनं हे कार्यकारी आदेशय्ह स्ताक्षर जुइगु खँ धयादीगु दु ।

एयरफोर्स वानय् ट्रम्पलिसे च्वनावःपिं पत्रकार तय्त ट्रम्पं धाःगु दु, ‘गन तक टिकटकया खँ दु, उकियात अमेरिकाय् प्रतिबन्ध तयेत्यनागु दु ।’ चिनियाँ प्रविधि कम्पनी बाइटडान्सं दयेकूगु टिकटक तसकं तीव्र गतिं मनूतय्सं ययेकाच्वंगु एप खः । अमेरिकाय् थ्व एपया प्रयोगकर्तात च्यागू करोड दु । अमेरिकाय् प्रतिबन्ध तयेवं  इटडान्सयात तःधंगु धक्का लाइगु अनुमान जुयाच्वंगु दु । छुं ई न्ह्यव जक भारतय् नं टिकटकय् प्रतिबन्ध तयेधुंकूगु दु । भारतय् थ्व एप तसकं लोकंह्वानाच्वंगु खः ।

अप्वः धयाथें चिचिहाकःगु हास्यमिश्रित अभिनय् दयाच्वनीगु टिकटक ल्याय्म्हतय् दथुइ तसकं लो कंह्वाना वनाच्वंगु दु । तर अमेरिकां थ्व एपं व्यक्तिगत विवरण संकलन यायेत छ्यलेफु धासें थुकिया सुर क्षायात कयाः न्ह्यसःचिं थना वयाच्वंगु दु । भारतं नं थ्व हे कारण क्यनाः प्रतिबन्ध तःगु खः । बाइटडान्सं धाःसा थ्व द्वपंयात अस्वीकार याना वयाच्वंगु दु ।

थ्वहे दथुइ टिकटकयात माइक्रोसफ्ट कम्पनी न्यायेत्यंगु समाचार नं पिहां वःगु दु । तर ट्रम्पं धाःसा माइक्रोसफ्टयात टिकटक न्यायेकेबीगु खँय् नं शंका प्वंकादीगु दु । सन् २०१९ या सुरु निसें टिकटक दकलय् अप्वः डाउनलोड जुइगु एपतय् धलखय् लाना वयाच्वंगु दु । कोरोना महामारीं लकडाउन जूबलय् थुकी झन मनूतय् आकर्षण तच्वःगु खः । आःतक थ्व ऐप निगू अर्ब क्वः डाउनलोड जुइधुंकूगु अनुमान दु । थुकिया सक्रिय प्रयोगकर्ताया ८० करोड दु । थ्व एप दकलय् अप्वः भारतय् डाउनलोड जूगु खःसा प्रतिबन्ध लिपा थ्व आः चीन व अमेरिकाय् दकलय् अप्वः बजाः कयाच्वंगु खः ।

अमेरिकी विदेशमन्त्री माइक पोम्पेओं टिकटकं संकलन याःगु तथ्यांक चिनियाँ कम्युनिष्ट पार्टीया ल्हातय् वनीगु द्वपं बियावयाच्वंगु दु । तर टिकटकं धाःसा तथ्यांक संकलन चीनं पिने जुइगु व पिने हे भण्डारण जुइगु खँ तःक्वः हे धायेधुंकूगु दु ।

‘जिपिं चिनियाँ सरकारया ल्हातय् दु धयागु खँ पूर्ण रुपं असत्य खः’ टिकटकया युरोप, मध्यपूर्व व अफ्रिकाया निंतिं सार्वजनिक नीतिया प्रमुख थियो बेर्टरामं बिबिसीयात धयादीगु दु । तर टिकटकया निंतिं दकलय् मछिंगु खँ धाःसा चिनियाँ सरकारं स्थानीय कानुन लगे यानाः बाइटडान्सपाखें विदेशी प्रयोगकर्तातय् तथ्यांक बीत बाध्य यायेफु धयागु खः । सन् २०१७ या चीनया राष्ट्रिय सुरक्षा कानुनय् छुं नं संस्था वा व्यक्तिं राज्यया जासुसी ज्याया निंतिं ग्वाहालि व सहकार्य यायेमाः धयागु व्यवस्था यानातःगु दु ।

सम्बन्धित बुखँ

LEAVE YOUR COMMENTS