सन्दीपयात न्हय्न्हु हिरासतय् तयेत अनुमति
येँ (नेपालभाषा टाइम्स)÷ बलात्कारया द्वपं लानाच्वंम्ह नेपाः राष्ट्रिय क्रिकेट टिमया पूर्व कप्तान सन्दीप लामिछानेयात न्हय्न्हु हिरासतय् तयाः अनुसन्धान यायेत येँ जिल्ला अदालतं अनुमति बिउगु दु । जिल्ला अदालतं असोज २० गते निसें लागु जुइकथं सन्दीपयात हिरासतय् तयेत अनुमति बिउगु खः ।
सन्दीप लामिछानेयात प्रहरीं असोज २० गते विमानस्थलं ज्वंगु खःसा मोहनिया बिदा सिधेवं सोमवाः लामिछानेयात अदालतय् यंकूगु खः । सन्दीप विरुद्ध भदौ २१ गते गौशालाय् च्वंगु प्रहरी वृत्तय् नाबालिकयात बलात्कार याःगु धासें उजुरी दायर जूगु खः । सन्दीपयात ज्वनेत नेपाल प्रहरीं इन्टरपोलया ग्वाहालि काःगु खःसा थ्व खँ सिइवं सन्दीप लिहां वःगु खः । सन्दीप उजुरी दर्ता जूगु लछि लिपा लिहां वःगु खः ।
उजुरी दर्ता जूगु इलय् सन्दीप केन्यालिसे टि–२० सिरिज म्हितेत वनाच्वंगु खःसा केन्यां क्यारेबियन प्रिमियर लिग म्हितेत वेष्ट इन्डिज वंगु खः । थः विरुद्ध बलात्कारया उजुरी लाःगु सिइवं सन्दीपं सामाजिक सञ्जाल मार्फत थः निर्दोष जूगु धकाः धयावयाच्वंगु खः । सोमवाः अदालतय् नं सन्दीपं थः निर्दोष जूगु दाबी याःगु खः । अथेहे सन्दीपं प्रहरीं थःगु गोपनीयता भंग याःगु द्वपं नं बिउगु खः ।
अदालतय् सन्दीपं जाहेरवाला नाबालिक मजूगु दाबी याःगु खः । जाहेरवाला १९ दँ दयेधुंकूगु सन्दीप धाःगु खः । सन्दीपया वकील सरोजकृष्ण घिमिरें थुकिया जानकारी बिउगु खः । अथेहे अधिवक्ता सुधा रिजालं सन्दीपयात फसे यायेत नक्कली जन्मदर्ता दयेकूगु धाःगु दु । जाहेरवालाया निगू जन्मदर्ता दुगु जानकारी सन्दीपया वकीलं बिउगु खः । अदालतं सन्दीपयात २७ गते हाजिर यायेत आदेश बिउगु दु ।
LEAVE YOUR COMMENTS