येँय् पहिचानवादी प्रदर्शन
येँ (नेपालभाषा टाइम्स)- प्रदेश १ या नां ‘कोशी प्रदेश’ तयेवं थ्व नां खारेज यायेमाः धासें म्हिगः येँय् नं प्रदर्शन जूगु दु । कोशी प्रदेश नां खारेजीया माग यासें म्हिगः पहिचानवादी संघसंस्थातय्सं येँया फिब्व ख्यलंनिसें संसद भवन तक र्याली न्ह्याकूगु खः ।
तर बानेश्वरया लँय् तुं प्रहरीतय्सं निषेधित क्षेत्र धकाः बारं घेरे याना तःगुलिं प्रदर्शन अनं च्वय् न्ह्याः वने मफुत । उकिं अन हे सभा यासें ज्याझ्वः क्वचायेकूगु खः ।
प्रदर्शनकारीतय्सं कोशी प्रदेशया नां ऐतिहासिक पहिचानया आधारय् हाकनं नामाकरण यायेमाःगु, प्रदर्शनया झ्वलय् सीम्ह पदम लिम्बुयात शहिद घोषणा यायेमाःगु माग याःगु खः ।
प्रदर्शनय् सचेत पहिचानवादी संघर्ष समिति, किराँत याक्थुङ चुम्लुङ नापं नेवाः देय् दबू, आदिवासी जनजाति महासंघ लगायतया पहिचानवादी संघसंस्थातय्सं ब्वति काःगु खः ।
ज्याझ्वलय् ब्वति काःपिं नेवाः कार्यकर्तातय्सं ‘बागमति’ प्रदेशया नां नं स्वीकार्य मजू धासें थ्व नां नं हिलाः पहिचानवादी नां तयेमाः धकाः नारा थ्वयेकीगु खः ।
पूर्वय् किराती जनतां पहिचानया सः थ्वयेकाः आन्दोलन यानाच्वंगु हे इलय् आः राजधानी येँय् नं निरन्तर आन्दोलन याना वनेगु तयारी जुयाच्वंगु खँ धाःगु दु ।
थ्वहे झ्वलय् प्रदेश १ या थीथी स्थानीय निकायया वडा कार्यालयय् वनाः किरातनी आन्दोलनकारीतय्सं ग्वःगु ताःफ्वः म्हिगः प्रहरी वयाः
तछ्याना बिउगु दु ।
LEAVE YOUR COMMENTS