उपमेयर डंगोलया ‘डिपफेक’ भिडियो दयेकूपिंत कडा कारवाही यायेत माग

येँ (नेपालभाषा टाइम्स)- यँ महानगरपालिकाया उपमेयर सुनिता डंगोलया ‘डिपफेक’ भिडियो दयेकाः चरित्र हत्या याःपिंत कडा कारवाही यायेत माग याःगु दु । नेवाः पत्रकार राष्ट्रिय दबू येँ जिल्लां थौं छगू प्रेस वक्तव्य पिथँसें आर्टिफिसियल इन्टेलिजेन्स छ्यलाः ‘डिपफेक’ भिडियो दयेकाः चरित्र हत्या याःगु खँय् गम्भीर आपत्ति प्वंकुसें थज्याःगु भिडियो सार्वजनिक याःपिंत कडा कारवाही यायेत माग याःगु खः ।

दबूया येँ जिल्ला शाखाया अध्यक्ष अर्बिन्द्रमान सिंह हस्ताक्षर यानाः पिथंगु वक्तव्यय् थुगु भिडियों ल्याय्म्हतय् मार्गदर्शक जुयाच्वंम्ह उपमेयर डंगोलया व्यक्तिगत प्रतिष्ठा व सामाजिक छविइ गम्भीर लिच्वः लाःगु खँ धयातःगु दु । थज्याःगु भिडियों उपमेयर डंगोलप्रति अन्याय जूगु जक मखु, थ्व समग्र समाजया निंतिं हे ग्यानापुगु खँ धयातःगु दु ।

थज्याःगु प्रविधिया दुरुपयोग यानाः दयेकीगु सामग्रीं गलत सुचना व समाचार सम्प्रेशन जुइगु धासें थज्याःगु ज्या विरुद्ध व्यापक जनचेतना थनेमाःगु खँ न्ह्यथँसें जनचेतना थनेगु ज्याय् दबूया नं साथ दइगु खँ नं वक्तव्यय् धयातःगु दु ।