पत्रकार महासंघया संस्थापक श्रेष्ठया १०५ दँ बुन्हि

यल (नेपालभाषा टाइम्स)- नेपाल पत्रकार महासंघया संस्थापक नायः सत्यनारायणबहादुर श्रेष्ठया १०५ दँ बुन्हि म्हिगः हन । ज्याझ्वलय् मूपाहां कथं सञ्चार तथा सूचना प्रविधि मन्त्री पार्वत गुरुङ झाःगु खः ।

ज्याझ्वलय् नेवाः पत्रकार राष्ट्रिय दबूया नायः सुरजवीर वज्राचार्य श्रेष्ठयात नेपाल पत्रकार महासंघया संस्थापक अध्यक्षया सम्मान बीमाःगु माग यासें सञ्चारमन्त्री गुरुङयात ज्ञापलनपौ लःल्हानादीगु दु। ज्ञापनपती धयातः कथं नेपाल पत्रकार महासंघया संस्थापक अध्यक्षया रुपय् पत्रकार संगठित यायेगु लागिं २००८ सालय् ‘नेपाल टुडे’ या सम्पादक श्रेष्ठं थःगु अध्यक्षताय् न्हापांखुसी नेपाल पत्रकार महासंघ गठन याःगु खः । २०१२ सालय् पत्रकारतय् मेगु बैठकं पुलांम्ह प्रधानमन्त्री कृष्णप्रसाद भट्टराईया सभापतित्वय् नेपाल पत्रकार संघ पुनर्गठन जूगु खः । वयां लिपा भट्टराईयात हे संस्थापक अध्यक्ष नालेगु यानाच्वंगु दु। थुकिं इतिहास हुइगु ज्या जुयाच्वंगु दु ।

ध्यानाकर्षण पौ लःल्हाना कासें सञ्चारमन्त्री गुरुङं थ्व विषयय् सरोकारवाला लिसे च्वनाः विवाद ज्यंकेगु कुतः यायेगु खँ बचं बियादिल । ज्याझ्वलय् नेपाल पत्रकार महासंघया उपाध्यक्ष दिलिप थापामगरं दस्तावेज, प्रमाण लुइके फत धाःसा महासंघं श्रेष्ठया योगदानया कदर याइगु विश्वास प्वंकादिल ।

उकथं हे मधेशी पत्रकार समाजया अध्यक्ष मोहन सिंहं थ्व बारे सत्यतथ्य फुकस्यां सिउसां नं सम्बोधन मयाःगु गुनासो प्वंकादिल । वय्कलं धयादिल, ‘देय्या गौरवशाली व्यक्तित्वया न्ह्यःने श्रेष्ठयात ध्याकुनय् लाकेगु ज्या जूगु दु ।’

सम्बन्धित बुखँ

LEAVE YOUR COMMENTS