इन्टरनेट पत्रकारिता व निर्वाचन विषयय् सहलह

येँ – नेपाल पत्रकार महासंघं विश्व प्रेस स्वतन्त्रता दिवसया लसताय् लाकाः छगू व्यापक सहलह ज्याझ्वः यात । ‘लोकतन्त्र व शान्तिया निंतिं संचार ः इन्टरनेटया युगय् पत्रकारिता व निर्वाचन’ विषयय् जूगु सहलह ज्याझ्वलय् स्वच्छ निर्वाचनया निंतिं अवसर व चुनौति विषयय् व्यापारक सहलह याःगु खः ।

नेपाल सरका, निर्वाचन आयोग, महासंघ, युरोपेली युनियन, युएनडीपी व युनेस्कोया मंकाः ग्वसालय् जूगु ज्याझ्वलय् मूपाहां संचार व सूचना प्रविधिमन्त्रीलिसें नेपाल सरकारया प्रवक्ता गोकुल बांस्कोटां संविधानं सुचनाया हक व पूर्ण प्रेस स्वतन्त्रताया सुनिश्चित याःगु धासें मर्यादित, उत्तरदायित्व व जिम्मेवार जुयाः जनताया दथुइ गुकथं स्थापित जुइगु धइगु हे आःया चुनौति जूगु धयादिल ।

लिसें वय्कलं लोकतन्त्रया विश्वव्यापी मान्यताकथं संचार कानून निर्माण यायेगु प्रतिवद्धता नं प्वंकादिल । प्रमुख निर्वाचन आयुक्त दिनेश थपलियां थुकथंया ज्याझ्वलं निर्वाचन प्रणालीइ सुधार हयेत सहकार्यया वातावरण तयार जुइगु विश्वास प्वंकादिसें निर्वाचन प्रक्रियायात प्रभावकारी यायेत आम संचार जक मखसे सामाजिक संजालया प्रयोग व पहुँच नं अप्वयेकेमाःगु खँय् बः बियादिल ।

ईयुया आवासीय प्रतिनिधि भेल्लरी जुलियन्डं मानवअधिकारया विश्वव्यापी घोषणापत्रया धारा १९ व २१ य् प्रेस स्वतन्त्रताया विषययात विश्वव्यापी रुपय् सुनिश्चित यानातःगु खँ कनादिल ।

ज्याझ्वलय् पुलांम्ह प्रमुख निर्वाचन आयुक्त भोजराज पोखरेल, बेलायती राजदूत रिचर्ड मुरिसन, प्रेस काउन्सिल नेपालया कार्यवाहक अध्यक्ष किशोर श्रेष्ठ, काउन्सिला दुजः शुभेच्छा विन्दु, महासंघया सभापति गोविन्द आचार्य, पुलांम्ह सभापति हरिहर विरही, आयोगया सहसचिव देवकुमारी गुरागाइँ लगायतया वक्तातय्सं थःथःगु धारणा तयादीगु खः ।
उगु हे ज्याझ्वलय् वरिष्ठ पत्रकारपिं धर्मेन्द्र झा, गोपाल गुरागाइँ, संगीता लामायात प्रेस स्वतन्त्रता सेनानी सम्मान नं लःल्हाःगु खः ।