सर्वोच्चया कामु प्रन्या हरिकृष्ण कार्की

येँ (नेपालभाषा टाइम्स)- सर्वोच्च अदालतया वरिष्ठतम् न्यायाधीश हरिकृष्ण कार्की म्हिगःनिसें कामु प्रधानन्यायाधीश जुयादीगु दु । कामु प्रधानन्यायाधीश दिपककुमार कार्की म्हिगः भारत भ्रमणय् वनेवं हरिकृष्ण कार्की कामु प्रधानन्यायाधीश जुयादीगु खः । वइगु असोज १५ गते लिपा ६५ दँ उमेर हदया कारणं कामु प्रधानन्यायाधीश दिपकुमारं अनिवार्य अवकाशय् वनेत्यंगु दु । वयां लिपा वरिष्ठतम् प्रधानन्यायाधीशया हैसियतं सर्वोच्चया कामु प्रधानन्यायाधीश हरिकृष्णं कःघानादी ।

प्रधानन्यायाधीश चोलेन्द्र शम्शेर जबरायात वंगु फागुन १ गते संसदय् महाभियोग प्रस्ताव दर्ता जुइधुंकाः सर्वोच्च अदालत कामु प्रधानन्यायाधीशया नेतृत्वय् न्ह्यानाच्वंगु दु । अझ वइगु चैत तक सर्वोच्च अदालत कामु प्रधानन्यायाधीशं न्ह्याकेमाःगु अवस्था ब्वलंगु दु । वइगु मंसिर २७ गते निलम्बित प्रधानन्यायाधीश जबरा नं ६५ दँ उमेर हदया कारणं अनिवार्य अवकाशय् वनेत्यंगु दु । वयां लिपा नं कामु प्रधानन्यायाधीश कार्कीं पूर्ण रुपय् प्रधानन्यायाधीशया हैसियतं ज्या याये धाःसा दइ मखु ।

संवैधानिक व्यवस्था कथं प्रधानन्यायाधीश जुइगु निंतिं न्हापां न्याय परिषदं वरिष्ठ स्वम्ह न्यायाधीशया नां संसदीय सुनुवाइ समितिइ छ्वयेमाःगु प्रावधान दु । वयां लिपा संसदीय सुनुवाइ समितिं स्वम्ह मध्ये छम्हेसिया नां अनुमोदन यात धाःसा जक प्रधानन्यायाधीशया रुपय् राष्ट्रपतिपाखें सपथ कयाः पूर्ण प्रधानन्यायाधीश कथं ज्या यायेदइ ।