जू म्हिताच्वंपिं प्यम्हेसित ज्वन
येँ – येँ महानगरपालिका १३ वडाया टेकुइ जू म्हिताच्वंगु अवस्थाय् प्रहरीं प्यम्हेसित ज्वंगु दु । टेकु दोभानय् च्वंगु विष्णु पोडेया छेँय् जू म्हिताच्वंगु इलय् प्रहरीं इमिगुपाखें ५८,५००÷– तका दां व खुज्वः तासलिसें ज्वंगु खः । अथे हे तोखा नगरपालिका वडा नं. ३ भुतखेल धइगु थासय् नं जू म्हिताच्वंपिं न्याम्हेसित प्रहरीं ज्वंगु दु ।
अनया छगू खाजा पसलय् जू म्हिताच्वंपिं रविन्द्र महर्जनलिसें न्याम्हेसित खुज्वः तास व ५६,०९५÷– तका दांलिसें प्रहरीं ज्वंगु खः । थ्व सम्बन्धय् प्रहरीं आवश्यक अनुसन्धान यानाच्वंगु दु । उखे महानगरीय प्रहरी वृत्त स्वयम्भूपाखें खटे जुया वंगु प्रहरीया पुचलं थीथी थासं अवैध लागू वासः लिसें स्वम्हेसित ज्वंगु दु ।
प्रहरीं पोल्याण्ड नांया अवैध लागू वासःलिसें गोरखाया एलिया मगर, सोलुखुम्बुया छिरिङ तेन्दु शेर्पा व उदयपुरया प्रशान्त विष्टयात ज्वंगु खः । स्वयम्भू वृत्तपाखें खटे जुया वंगु प्रहरीया पुचलं थीथी झिंछगू थासय् चेक प्वाइन्ट तयाः आकस्मिक रुपं कर्डन एण्ड सर्च याःगु इलय् इमित अवैध लागू वासः लिसें ज्वंगु खः ।
थ्व हे झ्वलय् धुम्बाराहीया छगू हार्डवेयर पसलय् खुया यंकूगु द्वपनय् रामेछापया ओमराज श्रेष्ठ, भारतया मोतिहारिया पारस प्रसाद व सन्तोष पोदारयात प्रहरीं ज्वंगु दु ।
येँ मनपा ४ धुम्बाराहीइ कर्ण बहादुर चौलागाइँया हार्ड वेयर पसलं थीथी सामान खुया यंकूगु घटनायात कयाः विशेष अनुसन्धान यायेगु झ्वलय् प्रहरीं खँज्याय् संलग्न बा १ ज २१९२ नंबरया ट्याक्सीलिसें उकिया चालक श्रेष्ठलिसें मेपिं निम्हेसित ज्वंगु खः । निगुलिं घटनायात कयाः प्रहरी आवश्यक अनुसन्धान यानाच्वंगु दु ।
LEAVE YOUR COMMENTS