सगरमाथा आरोही कल्पना महर्जनयात ज्यापु समाजया ग्वाहालि

यल – ज्यापु समाज यलपाखें विश्वया दकलय् तजाःगु च्वापुगुँ सगरमाथा आरोहणय् वनेत्यंम्ह नेवाः म्ह्याय्मचा कल्पना महर्जनयात आर्थिक ग्वाहालि याःगु दु । समाजं महर्जनयात छगू ज्याझ्वःया दथुइ छगू लाख तका दां ग्वाहालिकथं लःल्हाःगु खः ।‘समानताया निंतिं बुलन्द सः’ धइगु नारा बियाः सगरमाथा आरोहणय् यायेत्यंगु नेपाःया न्हापांगु मिसा पत्रकार सगरमाथा आरोहण दलया दुजः महर्जनसहितया पुचः आः याकनं हे आरोहणया निंतिं आधार शिविरपाखे वनेत्यंगु दु ।

नेपाःया मिसा पत्रकारतय् छगू पुचलं ‘न्हापांगु मिसा पत्रकार सगरमाथा आरोहण–२०१८’ नां बियाः सगरमाथा आरोहण यायेत्यंगु दु । समाजया नायः प्रेम महर्जनं साहसिक पलाः थवंथवय् हे छगू च्वछायेहगु ज्या जूगु धासें थज्याःगु ज्याय् सकसिनं ब्वहलय् ब्वह ल्वाकाः तिबी बीगु नं छगू सामाजिक उत्तरदायित्व बहन यायेगु खः धयादिल । उगु इलय् नायः महर्जनं ज्यापु समाजपाखें भिंतुना देछासे सकल ज्यापु जातिया प्रतिनिधित्व यासे समाजया ध्वाय् सगरमाथाय् ब्वयेके फयेमा धासें समाजया ध्वाँय् नं लःल्हानादीगु खः ।

पत्रकारिता ख्यलय् सक्रिय जुयाच्वनादीम्ह आरोही महर्जनं थःगु आरोहण सफलता लिपा थः क्रियाशील जुयाच्वनागु पर्यटन पत्रकारितापाखें ज्यापु समाजयात फक्व ग्वाहालि यायेगु बचं बियादिसें ग्वाहालिया निंतिं सुभाय् देछानादिल । उगु हे ज्याझ्वलय् महानगरीय प्रहरी प्रभाग पूच्वया न्हूम्ह इन्चार्ज नियुक्त जुयादीम्ह प्रहरी निरीक्षक चेतना पोखरेलयात नं समाजपाखें कार्यकाल सफलताया कामना यासे लसकुस याःगु खः ।

प्रभागया न्हूम्ह इन्चार्ज पोखरेलं ज्यापु समाजनाप सहकार्य यानाः जनसेवाय् लगे जुइगु प्रतिवद्धता प्वंकादीगु खः । नेवाः परम्पराकथं ख्यें सगं बियाः भिंतुना देछाःगु ज्याझ्वलय् समाजया निम्हम्ह न्वकु सविना महर्जनं लसकुस यानादीगु खःसा न्हापांम्ह न्वकु सन्तमान महर्जन, दांभरि बीरबहादुर महर्जनपिंसं नं थःथःगु नुगःखँ तयादीगु खः ।