विप्लवं तत्काल प्रतिरोध मयाइगु

येँ- सरकारं नेकपा विप्लव पुचःयात प्रतिबन्ध तःसां नं विप्लव पुचलं धाःसा तत्काल उकिया प्रतिरोध मयाइगु जूगु दु । सरकारं पार्टीया गतिविधियात प्रतिबन्ध तयेवं थीथी राजनीतिक पार्टी लिसे जनस्तरं उकियात कयाः सरकारया विरोध यासें राजनीतिक पार्टीयात प्रतिबन्ध तयेमजिउ धकाः सः थ्वयेकाच्वंगु खः । मेपिंसं यानाच्वंगु थ्व विरोध हे थःपिनिगु निंतिं पाय्छि जूगुलिं थःपिसं तत्काल सरकारया प्रतिरोध मयायेगु रणनीति विप्लव पुचलं दयेकूगु खँ सीदुगु दु ।

सरकारं मुठभेदया तयारी यानाच्वंसां विप्लव पुचलं धाःसा शान्तिपूर्ण रुपं प्रतिवाद यायेगु जुइ धायेगु यानाच्वंगु दु । सरकारं प्रतिबन्ध तःसां थःपिनिगु राजनीतिक व सांगठनिक अभियान धाःसा निरन्तर जुइ धासें तर दमन तच्वया वन धाःसा उकिया प्रतिवाद नं वहे कथं यायेगु जुइ धकाः नं विप्लवं ख्याच्वः बिउगु दु ।

सरकारं छखे थःपिंत प्रतिबन्ध तयेगु, मेखे वार्ताय् सःतेगु धायेगु अले हानं ल्वाभः लःल्हाये हजि धकाः ख्याच्वः नं बीगु यानाच्वंगु फुक्कं नाटक जक खः धासें थःपिंके अज्याःगु ल्वाभः छुं नं मदुगु खँ नं विप्लव पुचलं धाःगु दु ।

थःपिंसं शान्तिपूर्ण रुपं गतिविधि यानाच्वनागु व थःपिनिगु निलाया अभियान क्वचायेकाः आः उकिया समिक्षा यायेगु ज्या जुयाच्वंगु खँ विप्लव पुचलं धाःगु दु । सरकारं थःपिंलिसे वार्ता यायेगु खःसा दकलय् न्हापां थःपिंत तयातःगु प्रतिबन्ध चीकेमाःगु व नेता व कार्यकर्तायात जुयाच्वंगु धरपकड दिकेमाःगु शर्त विप्लवं न्ह्यथंगु दु ।