ब्वनेकुथि चायेकेत ‘च्यारिटी डिनर’ ज्याझ्वः
येँ(नेपालभाषा टाइम्स)- गुथि अस्ट्रेलियां नेपालभाषाया ब्वनेकुथि चायेकीगु जूगु दु । गुथि अस्टे«लियां ‘गुथि ब्वनेकुथि’ नामं ब्वनेकुथि चायेकेत्यंगु खः । ब्वनेकुथि चायेकेत कोष नीस्वनेया निंतिं वंगु शनिवाः छगू तःजिगु ‘च्यारिटी डिनर’ ज्याझ्वःया ग्वसाः ग्वःगु दु ।
गुथि अस्ट्रेलियां संचालन यायेत्यंगु गुथि ब्वनेकुथि हालय् जक अस्ट्रेलियां सरकारय् दर्ता नं यायेधुंकूगु दु । ब्वनेकुथि दर्तालिसें भाषा कक्षा संचालन याना वयाच्वंगु दुसा थ्व झ्वलय् आः भाषा, कला, संस्कृति नं अध्ययन याकेगु ल्याखं ब्वनेकुथिया रुपय् संचालन यायेगु तयारी जुयाच्वंगु दु ।
गुथिया अस्ट्रेलियां नायः उमेश नापितं गुथि अस्ट्रेलियांपाखें संचालन यानाच्वंगु ब्वनेकुथिया निंतिं चन्दा संकलन यायेगु ल्याखं च्यारिटी डिनर ज्याझ्वः ग्वसाः ग्वयागु व ज्याझ्वलय् दक्वं सामुदायिक संस्था, संस्थाया दुजःलिसें शुभेच्छुकपिंत नेपालभाषा ब्वनेकुथिया निंतिं कोषय् ग्वाहालि यायेत व उकिया निंतिं डिनर ज्याझ्वलय् ब्वति कायेत इनाप यानागु जानकारी बियादिल ।
च्यारिटी डिनर ज्याझ्वलय् अस्ट्रेलियांया निंतिं नेपाःया राजदूत कैलाशराज पोखरले मूपाहांकथं झायादीगु खःसा क्यान्टरबेरीया सांंसदलिसें न्यू साउथ वेल्सया औद्योगिक मन्त्री, कार्य स्वास्थ्य व सुरक्षा मन्त्री विशेष पाहांकथं ब्वति कयादीगु खः ।
गुथि अस्ट्रेलियांया संस्थापक पदम शाक्यं गुथि अस्टे«लियाया ब्वनेकुथिया निंतिं चन्दा संकलन यायेगु ल्याखं ग्वसाः ग्वयागु च्यारिटी डिनर ज्याझ्वलय् दक्वं समुदायया प्रतिनिधि व दुजःपिंत लसकुस याये खनाः थःपिं तसकं लय्ताःगु खँ कनादिल । लिसें उगु ज्याझ्वः ताःलाकेत प्रायोजन यानादीपिं, सरोकारवाला व सकल नेपाःमि समुदाययात नं सुभाय् देछासे अभियानं गति काइगु विश्वास प्वंकादिल ।
संस्था दुजःलिसें गुथि ब्वनेकुथिया संयोजक श्याम सैंजूं थुकथंया ज्याझ्वः ब्वनेकुथियात ग्वाहालि यायेत व मान्यता प्रदान याकेया निंतिं ग्वसाः ग्वयागु व थौंकन्हय् ब्वनेकुथिइ १४ म्ह विद्यार्थीत अध्ययन यानाच्वंगु जानकारी बियादिल । गुथि अस्ट्रेलियाया पुलांम्ह नायः गुप्त श्रेष्ठं ब्वनेकुथिया अध्यक्षया भाला कयाच्वनादीगु दु । उगु इलय् सांस्कृतिक ज्याझ्वः नं न्ह्यब्वःगु खः ।
LEAVE YOUR COMMENTS