आरआर क्याम्पसय् गुरुपुन्हि

येँ(नेपालभाषा टाइम्स)- रत्न राज्यलक्ष्मी (आरआर) क्याम्पसय् नेपालभाषा विषयया ब्वँमिपिंसं गुरुपुन्हि हंगु दु । वंगु दिल्लाथ्व पुन्हिकुन्हु क्याम्पय् बीए व एमए तगिमय् नेपालभाषा विषय ब्वनाच्वंपिं ब्वँमिपिंसं गुरुपुन्हि हंगु खः ।

नेवाः विद्यार्थीतय् संगठन नेवाः विद्यार्थी युनियनया संस्थापक नायः रिदेन महर्जनया सभापतित्वय् जूगु ज्याझ्वलय् युनियनया छ्याञ्जे प्रशान्त डंगोल, लिउ छ्याञ्जे इनद्रमान महर्जनं ब्वनामिपिंत सफू व पाठ्य सामग्री म्हो जूगु धासें सम्बन्धित निकायपाखें ध्यान बीत इनाप यानादिल ।

ज्याझ्वलय् क्याम्पस प्रमुख जीवनधर ज्ञवाली, सहायक क्याम्पस प्रमुख रविनदास श्रेष्ठ, नेपालभाषाया अध्यापकपिं प्रा. डा. चन्द्रमान वज्राचार्य, सह प्रा. मदनसेन वज्राचार्य, स्यानामिपिं दिपना शर्मा, श्रीमिला सुवाल, सुनिता राजभण्डारी ‘जुनु’, अनुपसिंह सुवाल, योगन्द्रराज राजकर्णिकारपिंत हनेज्या
याःगु खः ।

ज्याझ्वलय् जनगायक चन्द्रबहादुर ‘माइलादाई’ नं भजन न्यंकादीगु खःसा युनियनया दुजः सुमितदास रंजितकार, एमए तगिंया ब्वँमि रुपा शाहीं गुरुया सम्मानय् चिनादीगु चिनाखँ वाचन यानादीगु खः ।

उगु इलय् क्यान्सर ल्वचं कयाच्वंम्ह ब्वनामि अनिल महर्जनया दाजुयात वासः यायेत झिंछद्वः तका व जनगायक श्रेष्ठया जहानयात ग्वाहालिकथं न्याद्वः तका दां नं लःल्हाःगु खः ।