न्हूदँ समारोह समितिं विचाः हायेकल
येँ(नेपालभाषा टाइम्स)÷नेपाल संवत् न्हूदँ राष्ट्रिय समारोह समिति–११४३ पाखें नांजाःम्ह साहित्यकार चित्तरञ्जन नेपाली मदुगुलिं विचाः हायेकूगु दु । समितिया पुलांम्ह नायःलिसें सल्लाहकार तकं जुयादीम्ह नांजाःम्ह साहित्यकार नेपाली मदुगु दुःखय् विचाः हायेकूगु खः ।
समितिया नायः प्राडा नरेशमान वज्राचार्यया नेतृत्वय् समितिया पदाधिकारी व दुजःपिं मदुम्ह नेपालीया छेँय् वनाः विचाः हायेकूगु खः । उगु इलय् मदुम्ह नेपालीया लुमन्तिइ गुणानुस्मरण लिसें धारणी पाठ याःगु खः ।
नेपालभाषा एकेदमिया पुलांम्ह चान्सलर तकं जुयादीधुंकूम्ह वरिष्ठ साहित्यकार नेपाली ९२ दँया वैंशय् वंगु सोमवाः ओम अस्पतालय् वासः याकेगु झ्वलय् मदुगु खःसा उकुन्हु हे वय्कःया अन्तिम संस्कार नं याःगु खः ।
थ्व हे झ्वलय् समितिं छगू शोक विज्ञप्ती नं पिथंगु दु । नेपाल संवत् ११३९ न्हूदँ समारोह समितिया नायः जुयादीम्ह चित्तरञ्जन नेपाली मदुगु दुःखय् शोक विज्ञप्ती पिथंगु खः ।
नेपालभाषा एकदेमिया पुलांम्ह चान्सलरलिसें मदन पुरस्कार, श्रेष्ठ सिरपालं सम्मानित जुयादीधुंकूम्ह साहित्यकार व इतिहासकार नेपाली मदयाः नेपालभाषालिसें नेपाली साहित्य ख्यलय् पू मवनीगु क्षति जूगु विज्ञप्तीइ धयातःगु दु ।
LEAVE YOUR COMMENTS