पत्रकार दबू ख्वपया अधिवेशन

ख्वप(नेपालभाषा टाइम्स)- नेवाः पत्रकार राष्ट्रिय दबू ख्वप कचाया गुक्वःगु साधारण सभा व प्यक्वःगु अधिवेशन वंगु शुक्रवाः जुल । अधिवेशनं दबूया ख्वप कचाया न्हूधाः नं याःगु खः ।

कचाया नायः रामगोपाल तमखुया सभापतित्वय् जूगु अधिवेशनया उलेज्या मूपाहां मध्यपु थिमि नगरपालिकाया प्रमुख सुरेन्द्र श्रेष्ठं यानादीगु खः ।
मूपाहां नगर प्रमुख श्रेष्ठं भाषा, कला, साहित्य, संस्कृतिया उत्थानया निंतिं नगरपालिकां याना वयाच्वंगु ज्यायात निरन्तरता बिया वनेगु जुइ धयादिल । विशेष पाहां उपप्रमुख विजय श्रेष्ठं नगरपालिकाया भावी योजना व ज्या याना वनेगु झ्वलय् खने दयाच्वंगु समस्यायात कयाः जानकारी बियादीगु खः ।

दबूया केन्द्रीय सचिव केके मानन्धरं नेवाः पत्रकारतय्त वयाच्वंगु हाथ्यायात कयाः अवसरया रुपय् कया वनेमाःगु खँ कनादीगु खः ।
अधिवेशनय् राष्ट्रिय समाचार समिति (रासस)या फोटो पत्रकार रत्नकृष्ण श्रेष्ठं थः मांअबुया लुमन्तिइ स्वनादीगु ‘हरिलाल श्रीलक्ष्मी लुमन्ति पत्रकारिता सिरपाः’ लःल्हाःगु खः । झिद्वः तका दां व हनापौ सहितया उगु सिरपाः न्हापांखुसी पत्रकार कृष्ण प्रजापतियात लःल्हाःगु खः ।

पुरस्कृत पत्रकार प्रजापतियात मूपाहांपाखें हनापौ लःल्हानादीगु खःसा दाता श्रेष्ठं दां लःल्हानादीगु खः। अथे हे उपप्रमुख श्रेष्ठं दोसल्ला न्ययेकादीगु खःसा राष्ट्रिय विभूति शंखधर साख्वाः प्रतिष्ठानया नवनिर्वाचित नायः ज्ञानराम श्रेष्ठं तगः तपुलिं पुइकाः सम्मान यानादीगु खः ।

अधिवेशनं ख्वप कचाया न्हूधाः नं याःगु खः । तमखुया हे अध्यक्षताय् गठन याःगु गुम्हेसिया ज्यासना पुचलय् सुरेश ख्वाकः श्रेष्ठ न्वकु, देवेन्द्र प्रजापति छ्याञ्जे, चन्द्रकृष्ण श्रेष्ठ (गोपाल) दांभरिं व दुजलय् श्यामकुमार था, प्रकाश मल्ल, हरिसुन्दर छुकां, रेणु त्वानावासु व विरेन्द्र खाइजु च्वनादीगु दु ।