स्वयम्भूइ बिन्दवासिनीया शिलापत्र !

येँ – स्वयम्भूया आनन्दकुटी विहारया क्षेत्रय् वयाः छथ्वः अधिकारी ब्राम्हणतय्सं तये हःगु छगू न्हूगु शिलापत्रं यानाः विवाद ब्वलंगु दु । स्वनिगलय् लकडाउन जुयाच्वंगु इलय् छथ्वः मनूतय्सं वयाः उगु थासय् थःपिंसं वंगु १२० दँ न्ह्यवंनिसें विन्दवासिनी माईया पुजा याना वयाच्वनागु खः धकाः च्वयातःगु शिलापत्र तया थकूगु खः । उगु थासय् थःपिंसं पुजा याना वयाच्वनागु जुयाः थ्व मुक्कं लागा थःपिनिगु धार्मिकस्थल खः धइगु दावी उमिसं याःगु खः ।

आनन्दकुटी विहार व उगु लागाया मेपिं स्थानीय मनूतय्सं धाःसा अन आः तक गबलें नं विन्दवासिनीया माईया पुजा मजूगु खँ कंगु दु । नापं आनन्दकुटी विहारं नं अन सुनां नं छुं कथं विन्दवासिनी द्यःया नामय् पुजाआजा मजूगु खँ धाःगु दु । आकाझाकां अन शिलापत्र तये हःगु खनाः स्थानीय मनूत अजूचाःगु दु ।

थ्व विषययात कयाः स्वयम्भू महासमिति नापं स्थानीय खलः पुचः व क्लबतय् दथुइ खँल्हाबल्हा जुइत्यंगु खँ नं धाःगु दु ।