ने. सं. ११४६ बछलागा एकादशी - अपरा एकादशी, चित्तधर हृदय या १२०क्वःगु बुदिं

रामग्रामय् लेखाया छानबिन

येँ (नेपालभाषा टाइम्स)÷लुम्बिनी लागा दुने लाःगु रामग्राम क्षेत्र विकासया लागिं छुं कथंया प्रतिस्पर्धा मयासे विदेशी कम्पनीयात ठेक्का बिउगु धासें प्रतिनिधिसभाया सार्वजनिक लेखा समितिं छानबिन याइगु जूगु दु । छानबिन ज्या न्ह्याकेगु लागिं थ्व ठेक्का सम्बन्धी फुक्क भ्वं न्हय्न्हुया दुने हजि धकाः लेखा समितिं संस्कृति मन्त्रालय व लुम्बिनी विकास कोषयात पौ च्वया छ्वःगु दु ।

लेखा समितिया सभापति ऋषिकेश पोखरेलया कथं फुक्कं भ्वं वयेवं थुकिया बारे समितिं विस्तृत छानबिन ज्या न्ह्याकी । समितिं अर्थ मन्त्रालय, संस्कृति तथा पर्यटन मन्त्रालय व पुरातत्व विभागया लिखित असहमति दयेक दयेकं छाय् थ्व ज्या लिजय् बियागु धकाः नं न्ह्यसः तःगु दु । पुरातात्विक क्षेत्रय् उत्खनन् व निर्माण यायेबलय् उकिं लाके फइगु लिच्वः लिसें बिना प्रतिस्पर्धा निजी कम्पनीयात ९९ दँ तक अन च्वने फइगु सम्झौता यायेगु ज्यां छु गज्याःगु लिच्वः लाकी धइगु खँय् नं लेखा समितिं चिउताः प्वंकूगु दु ।

लुम्बिनी विकास कोषं उगु लागाया सर्वसाधारण मनूतय् ११६ बिघा जग्गा अधिग्रहण यानाः १२० बिघा जग्गा ९९ दँया निंतिं लिजय् बीगु समझदारी याःगु खः । थुकिइ पुरातत्व विभाग, पर्यटन मन्त्रालय व अर्थ मन्त्रालयं समेत लिखित असहमति प्वंकूगु खः ।

रामग्रामयात बुद्ध जीवनीलिसे स्वापू दुगु अतिकं महत्वपूर्ण स्थल कथं कायेगु याः । रामग्रामया दम्बःचा (ढिस्को) दुने आः तक नं भगवान बुद्धया अस्थि धातु सुरक्षित जुयाच्वंगु दनि धइगु विश्वास यानातःगु दु । उकिं थज्याःगु महत्वपूर्ण थाय् विदेशीतय्त ९९ दँ तक जिम्मा बीगु ज्यायात गम्भीर रुपं कायेमाःगु खँ धयाहःगु दु ।

लुम्बिनी विकास कोषं उगु थाय् सौन्दर्यकरण यानाः विश्वन्यंकं दुपिं बौद्ध पर्यटकतय्त सालेगु लागिं नेपाःया प्रोमिस ल्याण्ड नांगु कम्पनीलिसे सम्झौता याःगु खः । थन सौन्दर्यकरण यायेत मुक्कं ७ अर्ब तका लगानी यायेमाः । थ्व ध्यबा प्रोमिस ल्याण्डं सिंगापुरया मोक्ष फाउण्डेसनपाखें हयेगु ग्वसाः यानातःगु दु । विज्ञ सूत्रतय्सं धाःकथं मोक्ष फाउण्डेसनय् भारतया राष्ट्रिय स्वयंसेवक संघ (आरएसएस) या मनूतय्गु नं लगानी दु । मेखे मोक्षया नेपाली एजेन्ट प्रोमिस ल्याण्ड नं प्रधानमन्त्री प्रचण्डया घरपतिया कायं सञ्चालन याइगु संस्था खः ।

लिजय् कायेधुंकाः उगु थासय् गज्याःगु विकास यायेगु जुइ धकाः प्रोमिस ल्याण्डं इटालीया इन्जिनीयरतपाखें वृहत गुरुयोजना नं तयार याका तयेधुंकूगु दु ।