प्रदेश मन्त्री मानन्धरयात अभिनन्दन

थिमि (नेपालभाषा टाइम्स)- बागमति प्रदेशया खानेपानी, उर्जा व सिँचाइ मन्त्री वसन्तप्रसाद मानन्धरयात नागरिक अभिनन्दन याःगु दु । सिवा साय्मि खलकं थन जूगु छगू ज्याझ्वःया दथुइ प्रदेश मन्त्री मानन्धरयात नागरिक अभिनन्दन पौ लःल्हासे अभिनन्दन याःगु खः ।

ज्याझ्वलय् नवासें मन्त्री मानन्धरं ल्याय्म्हतय् तःधंगु मात्राय् जनशक्ति विदेश पलायन जुया वनाच्वंगु खँय् चिउताः प्वंकादिसें अज्याःगु जनशक्तियात स्वदेशय् आकर्षित याना तयेमाःगु खँय् बः बियादिल । सांस्कृतक गतिविधिपाखें ल्याय्म्हतय्त स्वदेशय् आकर्षित याना तये फइ धासें मन्त्री मानन्धरं धयादिल, ‘सांस्कृतिक गतिविधियात निरन्तरता बीमाः । थ्व बाहेकं पेशागत व व्यावसायिक ख्यलय् नं प्रोत्साहित याये फत धाःसा ल्याय्म्हतय्त स्वदेशय् हे आकर्षित याना तये फइ ।’

सांस्कृतिक पर्यटनया विकास यानाः ल्याय्म्ह पुस्तायात अर्थ व्यवस्थालिसे नं स्वाका यंकेगु नापं रोजगारी सिर्जना नं याये फत धाःसा ल्याय्म्हतय् स्वरोजगार याये फइगु वय्कःया धापू दु ।

भक्तपुर चेम्बर अफ कमर्सं भक्तपुर मानन्धर युवा संघया समन्वयय् तू चिकंयात ब्राण्डिङ यायेगु योजनायात च्वछायादिसें वय्कलं स्थानीय उत्पादनया रुपय् दुगु तू चिकंलिसें जुजु धौ, तगः तपुलि, बजि व स्थानीय अय्लाः लगायतयात प्रवद्र्धन यायेमाःगु व उकिया निंतिं थम्हं नं समर्थन यायेगु जुइ धयादिल ।

खलःया नायः मनोजलाल मानन्धरया सभापतित्वय् जूगु अभिनन्दन ज्याझ्वलय् खलःया पुलांम्ह नायःलिसें भक्तपुर चेम्बर अफ कमर्सया नायः न्हुछेरत्न मानन्धर, अष्टरत्न माननन्धर, कुमारलाल मानन्धर लगायतं थःथःगु नुगःखँ तयादीगु खः ।

ज्याझ्वः ख्वप नगरपालिकाया आर्थिक अनुदानय् छुं ई न्ह्यः जक निर्माण सम्पन्न जूगु लाय्कू सालय् जूगु खः ।