ने. सं. ११४३ चौलाथ्व पारू -

एक्जाभेटरं मनू तुया काल !

सतक दयेकेगु खँय् विरोध याःवःपिंत थज्याःगु दमन

येँ – बैतडीइ सतक दयेकेगु झ्वलय् विरोध याःवःपिंत एक्साभेटरया बकेटं हे तुयाः वांछ्वयेगु कुतः याःगु दुसा उकियात कयाः प्यखेरं विरोध नं शुरु जूगु दु ।बैतडीया दशरथ चन्द नगर–पालिकाय् सतक दयेकेगु खँय् विरोध यानाच्वंपिं स्थानीयतय्त एक्जाभेटरं तुयाकाःगु भिडियो सार्वजनिक जूगु खः ।

एभिन्युज टिभिं क्यंगु उगु भिडियो सामाजिक सञ्जालय् भाइरल जुयाच्वंगु दुसा विरोधीतय्त एक्जाभेटरया बकेटं तुइगु थेंज्याःगु अमानवीय ज्या याःगु धासें तःधंगु आलोचना जुयाच्वंगु दु । उगु भिडियोय् लँ दयेकेगु विरोध यानाच्वंपिंत हे तुया कायेकथं एक्जाभेटरं ज्या याःगु व थ्व झ्वलय् छम्ह मिसायात एक्जाभेटरया बकेटं थ्वानाछ्वःगु खनेदु ।

थ्व घटना जुइवं प्रहरीं चालकयात ज्वनेधुंकूगु दुसा मेपिं स्वम्हेसित नं न्यनेकनेया निंतिं ज्वनागु खँ बैतडीया प्रमुख जिल्ला अधिकारी आनन्द पौडेलं धाःगु दु । वय्कलं थ्व घटनाय् राजनीतिक रंग खनेदुगु धासें वय्कलं न्ह्यागु जूसां नागरिकयात एक्साभेटर छ्यलाः ख्यायेगु धयागु अपराध जूगुलिं अनुसन्धान न्ह्याकेधुनागु खँ धयादीगु दु ।

दशरथचन्द नगरपालिकाया ग्वाललेक धाःथासय् क्वय्या गां व च्वय्या गांया दथुइ सतक विस्तार यायेगु खँय् विवाद जूगु खः । क्वय्या गांयापिं लँ चायेकेगु पक्षय् दुगु खःसा च्वय्या गांयापिंसं थःपिनिगु सहमति मकासे लँ चायेकूगु धासें विरोध यानाच्वंगु खः ।

दशरथ चन्द नगरपालिकाया प्रमुख नरेन्द्रसिंह थापाया कथं स्वन्ति तकया निंतिं सतक विस्तार पनेगु निंतिं धाःगु खःसां क्वय्या गांयापिं थःपिंसं ध्यबा पुलाः एक्साभेटर हःगु खः । एक्साभेटर पनेत च्वय्या गांयापिंसं अप्पां कयेकाच्वंगु इलय् एक्जाभेटरं तुयाकायेत स्वःगु खः । थ्व झ्वलय् घाःपाः जूम्ह स्थानीय गौरी जोशीयात थप उपचारया निंतिं धनगढी यंकूगु खँ धाःगु दु ।

वयागु अवस्था चिन्ताजनक जूगु खँ धाःगु दु । थ्व घटनाय् मेपिं च्याम्ह नं घाःपाः जूगु खँ प्रहरीं धाःगु दु । प्रहरीया कथं स्थानीय सुरेन्द्रप्रसाद जोशी, नारायण जोशी, सन्तोष जोशी, पुष्कर जोशी, दिनेश जोशी व धर्मानन्द जोशी घाःपाः जूगु दु ।थ्व भिडियो पिहां वयेधुंकाः सामाजिक सञ्जालय् थ्व घटना तसकं बर्बर जूगु धासें तःधंगु आलोचना जुयाच्वंगु दु ।

राष्ट्रिय मानव अधिकार आयोगया दुजः मोहना आन्सारीं उगु भिडियो सेयर यासें च्वःगु दु, ‘धाथें मावनता तनेधुंकूगु खः ला ?’प्रदेश नं. २ या प्रमुख न्यायाधिवक्ता दीपेन्द्र झां थ्व घटनायात ‘ज्यान मार्ने उद्योग’ रुपय् कयाः दोषी विरुद्ध मुद्दा न्ह्याकेमाःगु खँ धाःगु दु ।