मेलम्चिया सुरुङ म्हुइ क्वचाल
येँ – मेलम्ची खानेपानी आयोजनाया सुरुङ म्हुइगु ज्या म्हिगः चान्हय् क्वचाःगु दु । म्हिगः बहनी तक सुरुङ म्हुइगु ज्या ६ मिटर जक ल्यं दनीगु खः । मेलम्चीया सुरुङ म्हुइगु ज्या क्वचाःगुलिं बिहीवाः मेलम्ची खानेपानी विकास समितिं विशेष ज्याझ्वः यायेगु तयारी यानाच्वंगु दु । मेलम्चीया सुरुङ म्हुइगु ज्या क्वचायेवं आः स्वनिगलय् मेलम्चीया लः वइगु पक्का जूगु दु ।
मेलम्चीनिसें येँया सुन्दरीजल तक लः हयेगु निंतिं २७.५ किलोमिटर सुरुङ म्हुइगु ज्या क्वचाःगु दुसा आः कंक्रिट व लाइनिङया ज्या जुयाच्वंगु खँ मेलम्ची आयोजनां धाःगु दु । न्हापांगु चरणय् मेलम्चीं न्हिं १७ करोड लिटर लः येँय् हइ । निगूगु चरणय् याङग्री व लार्के खुसिया १७÷१७ करोड लिटर लः हयेगु तयारी जुयाच्वंगु दु ।
स्वनिगलय् न्हिं ५१ करोड लिटर लः माग जुयाच्वंगु दुसा मेलम्चीइ लः वःसां नं उगु लः पर्याप्त मजुइगु जूगुलिं मेगु निगू खुसिया लः हयेगु तयारी आयोजनां यानाच्वंगु दु । मेलम्चीया लः सुन्दरीजलय् क्वफायेवं न्हिं न्याघौ लः इनेगु कथं आयोजनां तयारी यानाच्वंगु दु । मेगु निगू खुसिया लः हयेफत धाःसा नीप्यघौ हे लः इनेगु खँ नं आयोजनां धाःगु दु । मेलम्चीया लः येँय् वइगु जुइवं उगु लः प्रशोधन यायेत प्रशोधन केन्द्र दयेकेगु ज्या नं तीव्र रुपं न्ह्यानाच्वंगु दु । प्रशोधन केन्द्र ८ करोड लिटर प्रशोधन यायेगु क्षमता दुसा प्रशोधन केन्द्र दयेकेगु ज्या २० प्रतिशत जक ल्यं दनिगु खँ धाःगु दु ।
LEAVE YOUR COMMENTS