‘कोटेश्वरय् फ्लाइओभरया निंतिं जापानलिसे सहलह’

– मध्यपहाडी (पुष्पलाल) लोकमार्ग वइगु स्वदँ दुने
– येँ–रक्सौल रेलमार्गया पूर्व सम्भाव्यता अध्ययन क्वचाल
– कुलेखानी भीमफेदी सुरुंगमार्ग याकनं क्वचायेकेगु लक्ष्य

येँ – भौतिक, पूर्वाधार तथा यातायातमन्त्री रघुवीर महासेठं येँया कोटेश्वर–जडिबुटिइ भूमिगत लँ दयेकेगु निंतिं जापान सरकार लिसे खँल्हाबल्हा जुयाच्वंगु खँ धयादीगु दु । राष्ट्रिय सभाया प्रत्यायोजित व्यवस्थापन तथा सरकारी आश्वासन समितिया बैठकय् न्ववानादिसें मन्त्री महासेठं थ्व जानकारी बियादीगु खः ।

कोटेश्वर लागाय् जुइगु सवारी चाप म्हो यायेगु निंतिं थौंकन्हय् यलपाखे वइगु सवारी साधनयात मनोहरा करिडोर पाखे छ्वयेगु यानाच्वंगु दु । आः ‘फ्लाइ ओभर’ दयेकेबलय् कलंकीइ थें खुला यानाः दयेकेगु खःकि च्वय् त्वपुया दयेकेगु धयागु विषयय् सहलह जुयाच्वंगु खँ नं वय्कलं धयादीगु दु ।

मन्त्री महासेठं कुलेखानी भीमफेदी सुरुंगमार्ग याकनं क्वचायेकेगु लक्ष्य दुगु खँ नं धयादीगु दु । अथेहे रेल यातायातपाखे पूर्व–पश्चिम रेलमार्गया विस्तृत अध्ययन प्रतिवेदन तयार यायेगु ज्या जुयाच्वंगु धयादिसें थ्व रेलमार्गया लँपु ९४५ किमि जुइगु अध्ययनं खनेदुगु खँ नं धयादीगु दु ।

थुकिया २०० किमिइ ज्या नं सुरु जुइधुंकूगु दु । थीथी थासय् ट्रयाक दयेकेगु व ताँ दयेकेगु ज्या न्ह्यानाच्वंगु खँ वय्कलं धयादीगु दु । बुटवल स्वयां पूर्व व काँकडभिट्टया स्वयां पश्चिमय् ज्या न्ह्याकेगु लक्ष्य दु ।वय्कलं येँ–रक्सौल रेलमार्गया पूर्व सम्भाव्यता अध्ययन क्वचायेकाः चिनिया पक्षं प्रतिवेदन लःल्हायेधुंकूगु जानकारी नं बियादीगु दु ।

अथेहे काठमाडौं स्याफ्रुबेसीं रेलमार्गया पूर्वसम्भाव्यता अध्ययन यानाः विस्तृत अध्ययनया चरणय् थ्यंगु जानकारी नं मन्त्री महासेठं बियादीगु दु । अथेहे वय्कलं मध्यपहाडी (पुष्पलाल) लोकमार्ग वइगु स्वदँ दुने क्वचायेकेगु कथं ज्या न्ह्यानाच्वंगु खँ कनादिसें थ्व लोकमार्गया ४१०किलोमिटर लँ पिच जुइधुंकूगु खँ नं धयादीगु दु ।

थ्व लँ १ हजार ८७९ किमि ताःहाकःगु खः । स्वदँ दुने ज्या क्वचायेकेगु नि.तिं ५४२ किलोमिटर सतक दयेकेगु ठेक्काया व्यवस्थापन जुइधुंकूगु खँ नं वय्कलं धयादिल । अथेहे १२०० किमिया मदन भण्डारी राजमार्गया धरान हेटौंडा खण्डय् ज्या जुयाच्वंगु जानकारी नं वय्कलं बियादिल ।

थ्व राजमार्गय् छुं छुं ताँ दयेकेगु निंतिं ठेक्का सम्झौता जुइ ल्यंदनि । दछि दुने लँया ठेक्का सम्झौता क्वचाइगु धासें वय्कलं चिहाकःगु ताँ जूगुलिं दयेकेगु सुरु जूगु छुं ई लिपा हे क्वचाइगु खँ वय्कलं धयादिल ।थ्व झ्वलय् यातायात क्षेत्रया समस्या समाधान यायेगु निंतिं यातायात प्राधिकरण गठन जुइगु खँ नं वय्कलं धयादीगु दु । वय्कलं सरकारं याकनं हे स्वसः गः विद्युतीय बस न्यायेगु योजना दुगु जानकारी नं बियादीगु खः ।