राष्ट्रपतिं बः काःगु पञ्चायती ऐन कानून

येँ (नेपालभाषा टाइम्स)- सरकारं संसदपाखें पास यानाहःगु नागरिकता विधेयकयात राष्ट्रपति विद्यादेवी भण्डारीं हानं संसदय् तुं लित छ्वया हयेवं थुकियात कयाः थीथी कथंया चर्चा शुरु जूगु दु ।

पूर्व प्रधानमन्त्री केपी ओलीया पालय् सरकारं छ्वःगु अध्यादेशयात दर्ता जूगुयां छुं घौ लिपा हे चान्हय् तकं दताः जारी यानादीम्ह राष्ट्रपति भण्डारीं शेरबहादुर देउवां छ्वःगु विधेयकयात धाःसा झिंन्यान्हु तक थःथाय् तयाः नं स्वीकृत मयासे हानं संसदय् तुं लित छ्वया बिउगु खः ।

वय्कलं विधेयक लित छ्वसें क्यंगु सरोकारय् सुं नं नेपाली मिजनं सुं विदेशी मिसायात इहिपा याना हल धाःसा मिसायात तुरुन्त हे नागरिकता बीगु धकाः उल्लेख यानातःगु बुँदाय् आपत्ति क्यनादीगु खः । वय्कलं विधेयकय् उल्लेखित उगु बुँदा पाय्छि मजू धकाः पुष्टि यायेगु लागिं पञ्चायतकालय् लागू जुयाच्वंगु थीथी ऐन कानूनयात नजिरया रुपय् न्ह्यःने तयादीगु खः ।

वि.सं. २०३२ सालय् पञ्चायती व्यवस्थां संविधान हे संशोधन यानाः नागरिकता सम्बन्धी कानूनय् नेपाली मिजंलिसे इहिपा याना वःम्ह विदेशी मिसायात इहिपा जूगुयां न्यादँ लिपा जक नागरिकता बीगु धइगु प्रावधान तःगु खः । राष्ट्रपति विद्यादेवी भण्डारीं आः विधेयक लित छ्वयेगु लागिं न्ह्यथंगु तर्कय् पञ्चायतकालीन थ्व बुँदा नं न्ह्यथनादीगु दु ।

अथे हे पञ्चायती व्यवस्थां हे वि.सं २०३७ सालय् हानं कानून संशोधन यानाः नेपाली नागरिकलिसे इहिपा याना वःम्ह विदेशी मिसां थःगु पुलांगु नागरिकता त्याग यायेधुंकाः जक नेपाली नागरिकता बीगु धकाः उल्लेख याःगु बुँदायात नं न्ह्यथनादीगु दु ।

राष्ट्रपति भण्डारीं पञ्चायतकालीन कानूनया बः कयाः नागरिकता विधेयकय् पुनर्विचार या धकाः पौ छ्वया हःगुलिं मनूत अजूचायाच्वंगु दु ।

राजनीतिक ख्यलय् धाःसा राष्ट्रपति भण्डारीया थ्व ज्याखँयात एमाले अध्यक्ष केपी ओलीं भारतयात बिउगु हाथ्या धकाः व्याख्या याना हःगु दु । सरकारं आः पारित याःगु नागरिकता विधेयकं खास यानाः तराई लागाय् नेपाःमिलिसे इहिपा यानाः नं नागरिकता काये मखनाच्वंपिं आपालं भारतीय भौपिंत अःपुइगु अनुमान जुयाच्वंगु दु ।