सभामुखय् महराया उम्मेदवारी, निर्विरोध निर्वाचित जुइगु

येँ – माओवादी केन्द्रया नेता कृष्णबहादुर महरां प्रतिनिधि सभाया सभामुख पदय् उम्मेदवारी बियादीगु दु । सभामुखया निंतिं थौं सुथय् १० बजे निसें १ बजे तक नां दर्ता याकेगु ई क्वःछिनातःगु दु ।

नेपाली कांग्रेसं धाःसा सभामुखय् उम्मेदवारी मबिइगु जूगुलिं वय्कः निर्विरोध सभामुख जुइत्यंगु दु ।

थ्वयां न्ह्यः एमालें पुलांम्ह सभामुख सुवासचन्द्र नेम्वाङयात हाकनं सभामुख दयेकेगु कुतः याःगु खः । उम्मेदवारी दर्ता सुरु जुइ घौछि न्ह्यव नं थ्व बारे एमाले व माओवादी केन्द्रया शीर्ष नेता दथुइ सहलह जूगु खः । तर एकताय् वनेत्यंगु निगू पार्टी दथुइ न्हापा हे राष्ट्रपति एमालेयात बीगु व सभामुख माओवादीं कायेगु सहमति जुइधुंकू कथं आः महरां हे उम्मेदवारी बियादीगु खः ।

नेता महरां उम्मेदवारी बिउगुलिइ पुलांम्ह सभामुख सुवास नेम्वाङ हे प्रस्तावक जुयादीगु दुसा माओवादी नेता देव गुरुङ समर्थक जुयादीगु दु ।