येँय् हे दकलय् अप्वः संक्रमित

येँ (नेपालभाषा टाइम्स) – कोरोना संक्रमित जूपिं मनूत म्हिगः नं राजधानी येँय् हे दकलय् अप्वः खने दुगु दु। म्हिगः देय्न्यंकं ५८१ म्ह न्हूपिं संक्रमितत थपे जूगु खःसा उकी स्वनिगलय् जक १७२ म्ह खने दुगु खः । उकी दुने नं येँय् जक १२६ म्ह, यलय् ३८ व ख्वपय् ८ म्ह खने दुगु खः ।

राजधानी येँ धुंकाः दकलय् अप्वः संक्रमित खने दुगु बारा (६९ म्ह) खःसा वयां लिपा पर्सा (६४ म्ह) खः । थ्व ल्याखं थौंकन्हय् तराईया जिल्लाय् सिबें नं राजधानी येँय् दकलय् अप्वः संक्रमित जूपिं पिहां वयाच्वंगु दु ।

थ्वहे झ्वलय् भाइरस संक्रमणया जोखिम म्हो यायेगु निंतिं वाणिज्य तथा आपूर्ति मन्त्रालयं व्यवसायीतय् निंतिं न्हूगु स्वास्थ्य सुरक्षा सम्बन्धी मापदण्ड तयार याःगु दु। मन्त्रालयं जारी याःगु मापदण्ड कथं व्यवसायिक ज्या यायेगु थासय् वइपिं मनूतय्त मू लुखाय् हे थर्मल गनपाखें ज्वरो नापे यानाः जक दुकायेगु यायेमाःसा सुयाकें लक्षण खने दुसा वयात तुरुन्त परीक्षणया निंतिं छ्वयेमाः ।