भाःतपिनि नामय् सगरमाथा आरोहण

येँ – ख्वया च्वनेगु स्वयां म्येँ हालाच्वनेगु बांलाः ! खस भाय्या थ्व खँचुयात सार्थक यायेत थौंकन्हय् सक्रिय जुयादीगु दु । सोलुखुम्बुया निम्ह याकःमिसापिं ।खुम्जु गाउँपालिकाया निम्ह मय्जुपिं फुर्दिनी शेर्पा व निमाडोमा शेर्पा थौंकन्हय् सगरमाथा गयेगु तयारी याना च्वनादीगु दु । वय्कःपिंसं सगरमाथा गयेत्यंगुया कारण धाःसा ध्यबा कमे यायेत वा थःगु शोंख पूरा यायेत मखु ।

भाःतपिं सीगुलिं छेँय् च्वनाः उकिया दुःख माने यानाच्वनेगु पलेसा सगरमाथा गयाः कीर्तिमान तयेगु ज्या याःसा दुःख अथें मदया वनी व विश्वयात क्यनेगु ज्या नं जुइ धकाः थःपिंसं सगरमाथा गयेत्यनागु खँ वय्कःपिंसं कनादीगु दु । वय्कःपिं निम्हेसियां भाःतपिं सगरमाथा आरोहणय् मार्गदर्शक जुयाः ज्या याइपिं खः ।

तर सन् २०१४ य निमाडोमा व २०१५ य् फुर्दिनी शेर्पाया भाःतपिं दुर्घटनाय् लानाः सगरमाथाय् हे मंत । वयां लिपा वय्कःपिं निम्हं छेँय् तुं च्वनाः भाःत मदुगुया दुःख माने यानाच्वंगु खः । तर थथे यानाः जक च्वनेबलय् थःपिं छुं हे याये मफुपिं थें च्वनीगु व मदुपिनि आत्मायात नं शान्ति दइ मखु धइगु तायेकाः आः निम्हं जानाः थःपिंसं नं सगरमाथा गयेगु तयारी यानाच्वनागु खँ धाःगु दु ।

न्हापा न्हापा भाःतयात नापलायेत सगरमाथा आधारशिविर तक वये वने यायेधुंकूपिं थ्व निम्हं याकः मिसापिंसं आः सगरमाथाया च्वकाय् हे पलाः तयेगु ताः तयाः तयारी यानाच्वंगु दु । थुकिया लागिं चिचीजाःगु हिमालत गयेगु व सगरमाथा आरोहणया लागिं ध्यबा मुंकेगु ज्या उमिसं यानाच्वंगु दु ।

सम्बन्धित बुखँ

LEAVE YOUR COMMENTS