पार्किङया विकल्प मालेगु शुरु

येँ (नेपालभाषा टाइम्स)- येँया न्हू सतकय् पार्किङ चीकूगु खँयात कयाः स्थानीय वासिन्दा व व्यापारीतय्सं विरोध यायेवं येँ महानगरपालिकां सतकय् जुयाच्वंगु पार्किङया विकल्प मालेगु ज्या न्ह्याकूगु दु ।

येँ मनपां येँया लुँहितिइ दयेकाच्वंगु धराहरा नापं सञ्चय कोष दुगु भवनयात पार्किङया विकल्पया रुपय् काःगु दु । धरहरा नापं न्हू सतकय् च्वंगु पिपल्स प्लाजा, आरबी कम्प्लेक्स, ताम्राकार हाउस, रञ्जना कम्प्लेक्स, विशाल बजार, वीर अस्पताल, आर्मी भवन व लुँहितिया सञ्चयकोष भवनयात वैकल्पिक पार्किङ स्थलया रुपय् छ्यलेगु खँयात कयाः सहलह न्ह्याकाच्वनागु खँ येँमनपाया सहायक प्रवक्ता दिपक अधिकारीं कनादीगु दु ।

वय्कःया कथं धरहराया पार्किङ लछिया दुने सञ्चालन यायेगु व सञ्चय कोष भवनया पसः चीकाः अन नं पार्किङ दयेकेत पौ च्वयेधुंकूगु दु । येँ मनपां आः पार्किङ चीकेधुंकाः न्हूसतक लागाय् सवारी साधन हे निषेध यायेगु कथंया योजना दयेकाच्वंगु खँ नं सीदुगु दु ।

तर स्थानीय मनूतय्सं धाःसा येँ मनपां विकल्पया रुपय् न्ह्यःने तये हःगु थ्व पार्किङ स्थलत प्रयाप्त मजुइगु खँ धाःगु दु । न्हू सतकय् पार्किङ बन्द याःगुलिं उकिया विरुद्ध स्थानीय व्यापारीतय्सं संघर्ष समिति हे दयेकाः प्रदर्शन यानाच्वंगु दु ।